Այս օրը ծնվել է Սալվադոր Դալին

1904թ. այս օրը ծնվել է իսպանացի նկարիչ, գրող, և սյուրռեալիզմի հիմնադիրներից Սալվադոր Դալին:

1929 թվականին Դալին ծանոթանում է Պիկասսոյի և Բրետոնի հետ, և հենց այդ ծանոթությունն է դառնում նրա՝ սյուրռեալիստական ճանապարհ բռնելու սկիզբը, և 1929 թվականից նա լիովին ընկղմված էր այդ ոճի մեջ: 

Դալին աջակցել և մասնակցել է սյուրռեալիզմի զարգացմանը և հաճախ է գովազդել այդ ոճը, հետագայում ոճի առաջնորդները նրան մեղադրել են չափազանց շահամոլ լինելու մեջ: Նրա՝ այս ժամանակահատվածի նկարներն արտացոլում են տեսիլքային կերպարներն ու ամենօրյա առարկաները՝ անսպասելի կառուցվածքների տեսքով։

Դալիի նկարները բնորոշվում են իրենց մանր գծանկարով և իրատեսական մանրամասնություններով և, անշուշտ, անբասիր գույներով, որոնք ևս շեշտվում են թափանցիկ ջնարակումով: Նկարիչը նկարահանել է նաև սյուրռեալիստական ֆիլմեր, տպագրել նկարազարդված գրքեր, զբաղվել է նաև ոսկերչությամբ, պատրաստել թատրոնային բեմեր և հագուստներ: 

Մի անգամ Իսպանիայում համերգների ժամանակ տեղի է ունենում երկու հսկաների՝ Արամ Խաչատրյանի և Սալվադոր Դալիի հանդիպումը:

Հանդիպման օրը՝ նշված ժամից տասը րոպե շուտ, Խաչատրյանը ներկայանում է նկարչի դղյակ: Այստեղ նրան դիմավորում է դռնապանը և սիրալիր հրավիրում հյուրասենյակ:

Եվս մի քանի վայրկյան, և երկար սպասված հանդիպումը տեղի կունենա.…

Խաչատրյանն ուղղում է փողկապը, ավելի հարմարավետ տեղավորվում է բազկաթոռին և սպասում իսպանացուն, հիշելով, որ ճշտապահությունը Իսպանիայում այնքան էլ ընդունված չէ: Արդեն ժամը երկուսն է, իսկ Դալին չկա ու չկա: Անցնում է 10 րոպե, ևս 20-ը, անցնում է ամբողջ մի ժամ, իսկ Դալին այդպես էլ չի հայտնվում: Խաչատրյանը սկսում է նյարդայնանալ: Վերջապես նա որոշում է ոտքի կանգնել, սկսում է քայլել սենյակով, արձակում է բաճկոնի կոճակները, սրբում է ճակատի քրտինքը: Երբ արդեն ժամը երեքն անց կես է դառնում, Խաչատրյանն այլևս չի դիմանում այս անամոթությանը, փորձում է դուրս գալ սենյակից, սակայն՝ ապարդյուն…դռները կողպված էին, պատուհանները հնարավոր չէր բաց անել: Խաչատրյանի զայրույթը գագաթնակետին է հասնում։

Ժամացույցի սլաքները ցույց են տալիս ուղիղ ժամը 4-ը: Եվ հանկարծ սենյակում թաքնված բարձրախոսներից լսվում է «Սուսերով պարը», դռները բացվում են և շատ հանդիսավոր ներս է մտնում ամբողջովին մերկ Դալին՝ հեծած փայտի վրա և օդում թափահարելով մերկացրած սուրը: Գալիս է, պտտվում սենյակում երաժշտության հնչյունների ներքո, և դուրս է գնում: Երաժշտությունը դադարում է, դռները փակվում են, ներկայացումն ավարտվում է: Դռնապանը Խաչատրյանին դուրս է հրավիրում և ճանապարհում տուն:

Այսպես տեղի է ունենում երկու հսկաների շատ սպասված և անակնկալ ավարտ ունեցող հանդիպումը, որից հետո այլևս երբեք Արամ Խաչատրյանը Իսպանիա չի գնում: