Ընտանեկան անհաշտ մթնոլորտի պատճառով երեխաները պարբերաբար բացակայում են դասերից (տեսանյութ)

«Շիրակ կենտրոնն» իր նախորդ մի շարք հրապարակումներում նշել է, որ հասարակությունում առկա շատ ու շատ բացասական երևույթներ են խտացված տնակային ավաններում, որտեղ ապրող ընտանիքներում տղամարդկանց բացակայությունը կարծես թե կրում է համատարած բնույթ: Առավել ծանր է բազմազավակ ու մանկահասակ երեխաներ ունեցող ընտանիքների վիճակը: Տնակային ավաններում բնակվող երեխաների մեծ մասը դպրոցից հետո ուսումը որևէ տեղ չեն շարունակում: Ավելին, բազմաթիվ ընտանիքների երեխաներ զրկված են նախակրթարաններ հաճախելու հնարավորությունից, իսկ դպրոցահասակներից շատերը կամ հաճախում են գիշերօթիկ, կամ դպրոց հաճախում են ոչ կանոնավոր: Այս ավաններում զգալի թիվ են կազմում նաև միայնակ մայրերի ընտանիքները:

Մեկ նախադասությամբ` աղքատության դեմքը ևս առավել ընդգծված ու ցայտուն երևում է տնակային ավաններում, որտեղ հաճախակի էլ կարելի է հադիպել ընտանեկան բռնությունների:

Ներկայացվող տեսանյութը տնակային ավանում բնակվող և անհաշտ ընտանեկան մթնոլորտի պատճառով դպրոց ոչ կանոնավոր հաճախող երեխաների ընտանիքի մասին է: «Շիրակ կենտրոնի» պատրաստած այս տեսանյութում, հասկանալի պատճառներով, մի փոքր ծածկված են դեմքերը, ինչպես նաև նշված չեն կացարանի հասցեն ու այլ տվյալներ, որոնք բնականաբար առկա են մեզ մոտ: