Ո՞վ է «Սև-սև աչեր», «Հայ եմ ես, հայ ես դու» «հիթերի» հեղինակը (ֆոտո)

Երգահան, երաժիշտ Լևոն Աբրահամյանը, թերևս, այն մարդկանց թվին է պատկանում, ում անունը հանրությանը շատ ավելի քիչ է հայտնի, քան իր հեղինակած երգերն ու մեղեդիները:

Լևոն Աբրահամյանի գրչին են պատկանում դեռ 90-ականներին հիթ դարձած «Սև-սև աչեր», «Հայ եմ ես, հայ ես դու» և շատ այլ երգեր: Lurer.com-ն այսօր զրուցեց Լևոն Աբրահամյանի հետ՝ նրա կյանքի, ստեղծագործական գործունեության, Արամ Ասատրյանի հետ ծանոթության, ինչպես նաև նրանց ընկերության մասին:

- Մինչ մեր զրույցի բուն թեմային անցնելը, կխնդրեմ մի փոքր պատմեք Ձեր մասին:

- Ես ծնվել եմ 1966 թվականին՝ Էջմիածնում: Դեռ մանկուց մեծ սեր եմ ունեցել երգ-երաժշտության հանդեպ և հանրակրթական դպրոցում սովորելուն զուգընթաց ուսանել և ավարտել եմ Էջմիածնի երաժշտական դպրոցի ակորդեոնի բաժինը: Հետագայում ես ինքնակրթության միջոցով տիրապետեցի մի շարք երաժշտական գործիքների և մինչ օրս էլ շարունակում եմ զբաղվել ինքնակրթությամբ: Հիշում եմ, երբ 15-16 տարեկան էի, տարբեր երաժշտական խմբերում ելույթ ունենալուց բացի ես երգում, ինչպես նաև նվագում էի ռեստորաններում և խնջույքների ժամանակ: Զուգահեռաբար արդեն սկսեցի գրել երգեր:

- Իսկ ե՞րբ, որտե՞ղ և ինչպե՞ս տեղի ունեցավ Ձեր ծանոթությունն Արամ Ասատրյանի հետ:

- Արամ Ասատրյանի հետ վաղուց էինք ծանոթ. երկուսս էլ Էջմիածնից ենք, առավել ևս՝ նույն ասպարեզի մարդիկ: Մեր ծանոթությունը եղել է ուրախ առիթներից մեկի ժամանակ, որտեղից էլ սկիզբ առավ մեր ընկերությունը. 1983 թվականից սկիզբ առած մեր համագործակցությունը տևեց մինչև նրա մահը: Միասին թողարկեցինք մի շարք ձայներիզներ: Հիշում եմ, երբ 1987 թվականին թողարկեցինք «Պաղ աղբյուրի մոտ» ձայներիզը, այն մեզ բերեց առաջին մեծ հաջողությունը, ինչպես նաև մեզ սկսեցին ճանաչել, իսկ 1995 թվականին թողարկեցինք «Հայ եմ ես, հայ ես դու» ձայներիզը՝ մինչ օրս սիրված երգերով: Այդպես ամեն տարի մի ձայներիզ էինք պատրաստում միասին, որն էլ իր հերթին մեծ հաջողություն էր ունենում։



- Երգերը, որոնք Ձեր գրչին են պատկանում, միանգամից էին արժանանո՞ւմ նրա հավանությանը, թե՞ լինում էին դեպքեր, երբ երգի բառերը փոփոխության էին ենթարկվում։ Եվ եթե փոխվում էին, դուք ինչպե՞ս էիք դա ընդունում:

- Փոփոխությունները հիմնականում լինում էին բառերի վանկերի հետ կապված, բայց ասեմ, որ դրանք շատ աննշան էին, և ես այդ փոփոխությունները շատ նորմալ էի ընդունում:

- Կթվարկե՞ք Ձեր հեղինակային երգերը, որոնք տեղ գտան Արամ Ասատրյանի երգացանկում և նրան լայն ճանաչում բերեցին՝ դառնալով հիթ:

- Այս պահին, թերևս, դժվար թե կարողանամ այդ բոլոր երգերը մտաբերել, քանի որ դրանք շատ-շատ էին: Առաջին երգը, որը մեզ հաջողություն բերեց, «Պաղ աղբյուրի մոտ»–ն էր, որի բառերի հեղինակը ես եմ, իսկ երաժշտությունը՝ Ջիվանունն է, հետո՝ «Անկախ Հայաստան»–ը, որը նույնպես մեծ հաջողություն ունեցավ, իսկ «Սև-սև աչեր», «Հայ եմ ես, հայ ես դու», «Տարիներ-տարիներ», «Սուրբ Սարգիս», «Ես սիրում եմ քեզ» երգերն արդեն ամբողջ աշխարհի հայության շրջանում հիթ դարձան ու սիրվեցին շատերի կողմից:

- Ո՞վ է Արամ Ասատրյանի համար այցեքարտ դարձած, Ձեր հեղինակային «Սև-սև աչեր» երգի հասցեատերը, և արդյո՞ք այս երգն ունի նախապատմություն:

- «Սև-սև աչեր» երգը գրել եմ իմ բոլոր երգերի նման. Ձեր ասած հասցեատերը չի եղել, ում ուղղված կլինեին այդ խոսքերը: Ես այդ երգը պարզապես նվիրեցի բոլոր «սև աչեր» ունեցող հայ աղջիկներին:

- Հայ ճանաչված երգիչներից ուրիշ ովքե՞ր են կատարել Ձեր երգերը:

- Շատերն են կատարել իմ հեղինակային երգերը, այդ թվում նաև՝ Հարութ Փամբուկչյանը, Արմենչիկը, Էնդին, Տիգրան և Արտաշ Ասատրյանները, Փոլը:



- Այդուամենայնիվ, Ձեր երգերի մեծ մասը հնչել է Արամ Ասատրյանի կատարմամբ, իսկ այսօր ո՞ւմ եք վստահում դրանք:

- Այո՛, իմ երգերի լավագույն մեկնաբանը եղել է Արամ Ասատրյանը, իսկ այսօր ես իմ երգերը վստահում եմ նրա ավագ որդուն՝ Տիգրան Ասատրյանին, ով մեծ պատասխանատվությամբ և ուրախությամբ է կատարում իմ հեղինակային յուրաքանչյուր երգը, որպեսզի հետ չմնա իր հայրիկի կատարումներից: Ի դեպ ասեմ, որ արդեն մի քանի տարի է, ինչ ես հանդիսանում եմ նաև Տիգրան Ասատրյանի պրոդյուսերը և կարող եմ ասել, որ այսօր Տիգրանն ամեն ինչ անում է, որ շարունակի իր հայրիկի կիսատ թողած գործը:

- Իսկ դուք երբևէ ցանկություն չեք ունեցել Ձեր հեղինակային երգերը կատարել:

- Ոչ, հիմնականում չեմ երգում, պարզապես, երբ երգը պատրաստ է լինում, ես երգում եմ միայն այն ներկայացնելու համար, իսկ ընդհանրապես երգում եմ շատ քիչ ու միայն շատ նեղ ընկերական շրջապատում։ Բայց ասեմ նաև, որ տարիներ առաջ ձայնագրեցի մի շատ հրաշալի երգ, որը տարբեր ժամանակների հիթ դարձած «Խենթ աղջիկ»–ն էր. այն այսօր էլ է հնչում հայկական ռադիոկայանների եթերից, որի պատահական ունկնդիրը նաև ես դարձա:

- Ինչպես հայտնի է, դուք նաև հեղինակ եք մի շարք մեղեդիների ու պարեղանակների: Նոր ստեղծագործություններ սպասվո՞ւմ են առաջիկայում:

- Ասեմ, որ արդեն պատրաստ է իմ նոր հեղինակային պարեղանակների ու մեղեդիների ձայնասկավառակը՝ բոլորովին նոր ձայնագրություններով և կարծում եմ՝ շատ շուտով այն կհանձնեմ հանրության դատին։ Երգերի համար էլ ասեմ, որ մի քանի երգեր կան դարձյալ բոլորովին նոր, և դրանք էլ շուտով իրենց տեղը կգտնեն արդեն Տիգրան Ասատրյանի նոր ձայնասկավառակում:

{gallery}2041{/gallery}

Ռուբինա Հակոբյան