ԱՄՆ-ում շքերթի ժամանակ տեղի ունեցած փոխհրաձգությունից վիրավորվել է 19 մարդ

ԱՄՆ-ի Լուիզիանա նահանգի Նոր Օռլեան քաղաքում շքերթի ժամանակ կազմակերպած հրաձգությունից վիրավորվել է նվազագույնը 19 մարդ. հայտնում է Associated Press-ը` հղում կատարելով տեղական ոստիկանությանը: Ավելի վաղ հայտնի էր դարձել 12 վիրավորի մասին:

Ոստիկանությունում նշել են, որ վիրավորների մեծ մասը, որոնց թվում` 10-ամյա մի աղջիկ, հիմնականում թեթև աստիճանի վնասվածքներ են ստացել:

Հրաձգության մեջ կասկածում են 3 տղամարդու, ովքեր փախուստի են դիմել ոստիկանությունից: Այս պահին ոչ ոք ձերբակալված չէ:

Հրաձգությունը տեղի էր ունեցել մայրերի օրվա կապակցությամբ կազմակերպած շքերթի ժամանակ: Հետաքննությունների դաշնային բյուրոն այս կապակցությամբ արդեն հայտարարել է, որ սա ահաբեկչություն չէ, այլ փողոցային սովորական հանցագործություն: Հանցագործների հետքի վրա դուրս բերելու համար Հետաքննությունների դաշնային բյուրոն 10 հազար դոլար պարգև է  խոստանում: