Հայաստանից մեկ հոգու հեռանալն անգամ լուրջ խնդիր է. կանխե՛լ արտագաղթը

Արդեն երկար ժամանակ է, խոսվում է արտագաղթի աճող տեմպերի և դրա վտանգավոր հետևանքների մասին:

Կարծիքները տարբեր են. ոմանք կարծում են, որ արտագաղթի մասին խոսողներն ավելի են ինտենսիվացնում այդ գործընթացը, ոմանք էլ խոսակցությունները կապում են ընտրությունների հետ, նշելով, որ արտագաղթի մասին խոսակցությունները հասունանում են նախընտրական շրջանում:

Ինչևէ, մինչ հնչում են տարբեր կարծիքներ տարբեր քաղաքական գործիչների կողմից, արտագաղթը շարունակվում է: Հաշվի առնելով այդ երևույթի վերաբերյալ շրջանառվող բազմապիսի կարծիքները, Լուրեր.com-ը զրուցեց քաղտեխնոլոգ Կարեն Քոչարյանի հետ՝ հասկանալու համար, թե արդյոք վիճակն իսկապես այդքան անհուսալի է, իրոք մարդիկ հարյուրներով ու հազարներով արտագաղթում են, և թե ինչ քայլեր է անհրաժեշտ ձեռնարկել արտագաղթը կանխելու համար:

Վերջինս նշեց, որ իր համար էական չէ՝ Հայաստանը լքում է մեկ հոգի, թե՝ հարյուրները, քանի որ արտագաղթն իրականում Հայաստանի համար շատ մեծ խնդիր է:

«Արտագաղթը կա: Ու եթե մի հոգի էլ լքում է Հայաստանը, դա արդեն ինքնին մեծ խնդիր է: Հայաստանի նման երկրի համար, որն ունի ազգային անվտանգության խնդիր՝ դեմոգրաֆիական վիճակի առումով, մեկ հոգու հեռանալն անգամ լուրջ խնդիր է, և անհրաժեշտ է օր առաջ կանխել դա: Ինձ հեռացողների քանակը չի հետաքրքրում, ինձ հետաքրքրում է անգամ մի հոգի հեռացողը»,-ասաց Քոչարյանը:

Իսկ թե ինչպես կարելի է կանխել արտագաղթի աճող տեմպերը, քաղտեխնոլոգն ասաց. «Պատասխանատու մարդիկ թող մտածեն. կան մարդիկ, ովքեր դրա համար գումար են ստանում»:

Հ.Գ. Արտագաղթի պատկերն ավելի հստակ ցույց տալու համար Ձեզ ենք ներկայացնում ԱՎԾ պաշտոնական տվյալները, որոնցում ներառված է նաև «ՀՀ սոցիալ-տնտեսական վիճակը 2013թ. հունվար-մարտ ամիսներին» զեկույցը, ըստ որի՝ ՀՀ-ից հեռացել է 259.210, և վերադարձել՝ 223.710 ՀՀ քաղաքացի:

Նկատենք, որ այս տարվա առաջին եռամսյակի ցուցանիշները մոտ 10 հազարով գերազանցել են նախորդ տարվա տվյալները. 2012թ. առաջին եռամսյակում ՀՀ-ից հեռացած ու երկիր ժամանած ՀՀ քաղաքացիների թվի տարբերությունը կազմում էր -25 հազար 394 մարդ: 

Գայանե Համբարձումյան