Ո՞ւմ համար

Ահա և Բելառուսի նախագահ Ալեքսանդր Լուկաշենկոն Հայաստանում է, համաձայն նախագահական պաշտոնական կայքի` նա այստեղ է Սերժ Սարգսյանի պաշտոնական հրավերով, սակայն, ըստ էության, ինչպես նաև՝ բելառուսական մամուլի հաղորդմամբ, Լուկաշենկոն իրականում Հայաստանում է գտնվում Գագիկ Ծառուկյանի հրավերով:

Այս վարկածը բավական ճշմարտանման է՝ հաշվի առնելով մի քանի կարևոր հանգամանք. նախ՝ Գագիկ Ծառուկյանի հետ Լուկաշենկոյի ունեցած բարեկամական կապերը, ապա՝ Ծառուկյանների ընտանիքի հովանավորությամբ կառուցված Սուրբ Հովհաննես եկեղեցու և «Փարավոն» հսկայական, ասում են՝ նաև տարածաշրջանում նմանը չունեցող, ժամանցային կոմպլեքսի բացման փաստերը, գալիս են միայն հաստատելու միտքը:

Սակայն այդ դեպքում հետաքրքրականը այն իրավիճակն է, որում հայտնվել է Սերժ Սարգսյանը. իսկ ի՞նչ իրավիճակում է հայտնվել նախագահը։ Փաստացի ստացվում է, որ որևէ պետության նախագահը ժամանել է Հայաստան ոչ նախագահի հրավերով. ստեղծված իրավիճակը անհեթեթ կարող էր լինել ոչ միայն Սերժ Սարգսյանի, այլև նման իրավիճակում հայտնված օտարազգի նախագահի համար: Եվ այս պարագայում քայլեր չձեռնարկել՝ կնշանակեր կապիտուլացվել, այս դեպքում՝ Գագիկ Ծառուկյանի կողմից, ինչն, իհարկե, հաշվի առնելով վերջին դեպքերը՝ անթույլատրելի է Սերժ Սարգսյանի համար:

Ըստ էության, վերջին օրը միայն Սերժ Սարգսյանին հաջողվեց ձևակերպել երևույթը պաշտոնականի ֆորմալ քողի ներքո՝ խուսանավելով նախագահների մակարդակով կուրիոզի կենտրոնում հայտնվելուց:

Սակայն այս իրավիճակից զատ՝ գոյություն ունի ևս մի կարևոր հանգամանք, որը խոստանում է լինել բավականին հետաքրքրական՝ Սերժ Սարգսյանի և Գագիկ Ծառուկյանի շփման ֆոնին: Արդեն իսկ հայտնի է, որ Ալեքսանդր Լուկաշենկոն պաշտոնական այցի շրջանակներում մասնակցելու է Սուրբ Հովհաննես նորակառույց եկեղեցու բացման արարողությանը, և, ուշադրություն՝ Սերժ Սարգսյանի ուղեկցությամբ:
Ստացվում է, որ Սերժ Սարգսյանն արարողությանը մասնակցում է՝ ելնելով նույն այն իրավիճակից, որում հայտնվել է, այսինքն՝ յուրատեսակ փակուղային իրավիճակից, որը ենթադրում է միայն մեկ ճանապարհ, և որն էլ տանում է Գագիկ Ծառուկյանին ընդառաջ:  

Այսպիսով՝ ի՞նչ կարող է ստացվել այս եռակողմ հանդիպումից.

Առաջին տարբերակում սա կարող է լիցքաթափել այն լարված իրավիճակը, որն այսօր ստեղծվել է Հայաստանում: Այն կարող է մեղմել տեմպը, որը բացառում է ԲՀԿ-ի դերը ներքաղաքական կյանքում, և ինչպես ցույց տվեց կառավարության նոր կազմը, անգամ նաև սպորտում: Այսինքն՝ ստացվում է, որ Գագիկ Ծառուկյանը ճանապարհներ է փնտրում Սերժ Սարգսյանի հետ հարաբերությունների կարգավորման համար, որը կարող է կա՛մ պսակվել հաջողությամբ՝ կախված հանդիպման ենթատեքստից, կա՛մ՝ ձախողվել:

Իսկ ահա երկրորդ տարբերակում այս մեթոդով Գագիկ Ծառուկյանն իրավիճակ ստեղծելու նախաձեռնությամբ կարող է հանդես գալ, այսինքն՝ բոլորին կարող է ցույց տալ, որ ոչ միայն Սերժ Սարգսյանը կարող է և ընդունակ է հանդիպումներ նշանակել և Բաղրամյան 26-ում խաղի կանոններ թելադրել, այլև ինքը. այսինքն՝ ստեղծելով նմանօրինակ միակ ելքով իրավիճակ՝ Գագիկ Ծառուկյանը Սերժ Սարգսյանին ստիպում է գնալ իրեն ընդառաջ՝ ցույց տալով իրավիճակ ստեղծելու իր կարողությունը և դրա միջոցով իշխանական սեգմենտ ակնկալելով:

Այսպիսով՝ ամեն դեպքում, այս իրավիճակում Գագիկ Ծառուկյանը հանդես է գալիս կազմակերպչի դերում, որը ենթադրում է Սերժ Սարգսյանի կողմից առաջիկայում ճնշման թուլացում, կամ, նվազագույնը, երկխոսության եզրեր գտնելու գրավական, ինչու չէ՝ նաև իշխող համակարգի որոշակի սեգմենտի ակնկալում, որն այսօր օդի ու ջրի պես անհրաժեշտ է Գագիկ Ծառուկյանին՝ հաշվի առնելով այն իրավիճակը, որում հայտնվել է Օլիմպիական կոմիտեի նախագահը:

Գևորգ Ավետիսյան