Քննարկվում է սողանքների կառավարման ծրագիր

Մայիսի 13-ին ՀՀ ԱԻՆ փրկարար ծառայության տնօրեն, գեներալ-մայոր Սերգեյ Ազարյանն ընդունել է Ճապոնիայի միջազգային համագործակցության գործակալության (JICA) հետազոտական խմբի անդամներին՝ JICA-ի Ուզբեկստանի տարածաշրջանային գրասենյակի ղեկավար Յուկիհիկո Էջիրիի գլխավորությամբ:

Հանդիպման նպատակն էր քննարկել Հայաստանում սողանքների կառավարման ծրագիրը, որում ներգրավված կլինեն նաև JICA-ի փորձագետները:

Խոսելով հետազոտական խմբի այցի նպատակների մասին՝ Յուկիհիկո Էջիրին մասնավորապես ասաց. «Մենք պետք է հասկանանք, թե ինչպիսին է սողանքային իրավիճակը Հայաստանում: JICA-ն արդեն երկրորդ հետազոտական խումբն է ուղարկում Հայաստան: Այս ընթացքում, ծրագրի մանրամասները քննարկելով, մենք կհաստատենք այն: Ուրախ ենք, որ այս ծրագրի շրջանակներում համագործակցելու ենք ՀՀ ԱԻ նախարարության հետ»:

Շարունակելով թեման Ս. Ազարյանը նշեց. «Հայաստանում մեծ քանակությամբ սողանքային տեղամասեր կան՝ մոտ 3000, որոնցից 300-ը բավականին ակտիվ են: Մեր գլխավոր նպատակն է ստեղծել սողանքների կառավարման պլան, իսկ առավել վտանգավոր սողանքների դեպքում՝ ավտոմատ կերպով իրականացնել մոնիթորինգ»:

ՓԾ տնօրենը ներկայացրեց սողանքային իրավիճակը Հայաստանում և ավելացրեց, որ ծրագրի շրջանակներում ճապոնական գործակալության կողմից հնարավոր տեխնիկական աջակցությունը շատ գնահատելի և օգտակար կլինի:

Ծրագրի հայեցակարգը քննարկելուց հետո հետազոտական խմբի ղեկավարի տեղակալ Քենջի Յանոն նշեց. «Մեկ ամսվա ընթացքում կքննարկենք ծրագրի շրջանակներում փոխգործակցության բոլոր մանրամասները: Կարծում եմ՝ շատ արդյունավետ ծրագիր կստացվի և սողանքների կառավարումը Հայաստանում առավել կազմակերպված և արդյունավետ կդառնա»:

Հանդիպման ավարտին կողմերը որոշեցին ոլորտի մասնագետների հետ ծրագրի վերաբերյալ քննարկում անցկացնել, ինչի արդյունքում պարզ կդառնա, թե ճապոնական գործակալությունն ինչպիսի տեխնիկական աջակցություն կարող է տրամադրել հայկական կողմին: