Կարա՞ մեր վարչապետը Ռուսաստանին հարցնի՝ ո՞րն ա մեր մեղավորությունը. ավտոներկրողների բողոքի ակցիան
Հասարակություն«Հայաստանը Մաքսային միության անդամ ա, իսկ Մաքսային միությանը անդամակցելու իմաստը հիմնականում կայանում ա նրանում, որ դրա անդամների ապրանքները ազատ շրջանառություն կարան ունենան Մաքսային միության տարածքում: Արդեն մեկ ամիս ա, ինչ հայկական համարանիշներով սեփականատերերի ավտոմեքենաները առգրավվում են, իսկ հիմնավորումը մինչև հիմա պարզ չի: Այս ամենի արդյունքում, էս մարդիկ ինչքան մեքենա, որ բերել են Հայաստան, մնալու են ստեղ կանգնած, ու ինչքան գումար, որ ծախսել են էդ ավտոների վրա, գնացել ա պետական բյուջե, իրանք էլ մնացել են առանց գումար»,- այս մասին Կառավարության շենքի դիմաց լրագրողների հետ զրույցում ասաց ավտոներկրող ցուցարարներից մեկը:
Ցուցարարը նշում է, որ Ռուսաստանում ավտոմեքենաների առգրավվումը կատարվում է ոչ օրինական, քանի որ, ըստ Մաքսային միության 2014 թվականի պայմանագրի, յուրաքանչյուր անձ, որը ունի Հայաստանի գրանցում, իրավունք ունի մեքենա գնելու ու շահագործելու այն:
Ցուցարարները կառավարության շենքի դիմաց հավաքվել են հանուն մեկ նպատակի՝ քննարկում անցկացնել վարչապետի հետ և հասկանալ նրա դիրքորոշումը. «Մեր կառավարությունը լռում ա, իսկ ամբողջ Ղազախստանը ու Ռուսաստանը բոյկոտում են հայկական մեքենաները: Էդ երկրների քաղաքացիները ցույցեր են անցկացնում, բողոքի ակցիաներ, որ իրանց դուր չի գալիս, որ իրանց տարածքում օգտագործվում են շարժական տրանսպորտային միջոցներ: Հիմա վարչապետը թող հարց ուղղի Ռուսաստանին Հայաստանի մեղավորությունը ո՞րն ա, ի՞նչ ա ուզում Ռուսաստանը, մշտակա՞ն գրանցում, կացության կարգավիճա՞կ ա ուզում, կարա՞ էս հարցադրումները մեր վարչապետը տա Ռուսաստանին ու էս հարցերը վարչապետը կարգավորի»,-նշեց մեկ այլ ցուցարար:
Ավտոներկրողներին անհանգստացնում է ոչ թե այն, որ ունեն կուտակված ավտոմեքենաների խնդիր, որոնք չեն վաճառվում, այլ այն, որ պարբերաբար բոյկոտվում են Ղազախստանի և Ռուսաստանի թե´ պետության, և թե´ հասարակության կողմից:
Հիշեցնենք, որ Ռուսաստանում հայկական պետհամարանիշներով մեքենաներ վարելն արգելվում է։