«Երեխուս բանակ եմ ճանապարհել մեծ հույսով, որ հետ կգա, բայց...»

Ադրբեջանական ագրեսիան հետ մղելու ընթացքում սեպտեմբերի 27-ին մահացու հրազենային վիրավորում է ստացել շարքային զինծառայող Ալեքս Պողոսյանը: Ալեքսը ծնվել և մեծացել է Վանք գյուղում: Նա իր ծառայությունն իրականացնում էր Հադրութում: 9 ամսից Ալեքսի ընտանիքը կդիմավորեր իր զինվորին: ԼՈՒՐԵՐ.com-ը կապ հաստատեց հերոսի հայրիկի՝ Վարդան Պողոսյանի հետ, որը հպարտությամբ, բայց և սրտի մեծ կսկիծով խոսեց մեր նորօրյա հերոսի մասին. «Ալեքսս մեծին մեծ էր հարգում, փոքրին՝ փոքր: Այնպես չէ, որ իմ երեխան է՝ գովում եմ: Սովորական երեխա էր, մեծացել էր առանց մոր, իրեն պահել ենք ես ու ծնողներս: Երեխուս բանակ եմ ճանապարհել մեծ հույսերով սպասելով, որ հետ կգա»,-ասաց զինվորի հայրը:

Ինչպես նշում է Վարդան Պողոսյանը, Ալեքսը, անգամ, ազատ ժամանակ էր նախընտրում աշխատելը. «Շատ աշխատասեր երեխա էր Ալեքսս: Անգամ, ամառային արձակուրդներին ինքը աշխատում էր: Մեր գյուղում ռեստորան ունեինք, որտեղ մատուցող էր աշխատում, բարմեն, պոպոկ էր հավաքում, վաճառում: Ալեքսս իր բոլոր ծախսերը ինքն է հոգացել: Երբեք նեղություն չի տվել ինձ»,- ընդգծեց նա: 

Ալեքսը սովորում էր Շուշիի տեխնոլոգիական համալսարանում: Ըստ նրա հայրիկի՝ նա շատ նպատակներ ուներ, ցանկանում էր վերադառնալ և գյուղատնտեսությամբ զբաղվել. «Ծրագրել էինք նաև, որ միասին աշխատեինք ու տուն գնեինք, 23 տարի է՝ վարձով ենք ապրում»:

Վերջինս մեզ հետ զրույցում պատմեց որդու հետ պատահածը. «Դեպքը պատահել էր ամսի 27-ի երեկոյան: Ալեքսենց դիրքերը այդքան էլ վտանգավոր իրավիճակում չէին գտնվում այդ ժամանակ, հիմնական գործողությունները կատարվում էին իրենց կողքի դիրքերից մեկում: Երբ հրամանատարը գնում է այդ դիրքին օգնություն ցույց տալու, Ալեքսս ևս գնում է հրամանատարի հետ՝ չլսելով նրա հորդորը, որ մնա դիրքում: Թշնամին տանկի միջից դուրս է գալիս և 15 մետր հեռավորությունից Ալեքսին հասցնում է հրազենային 3 վնասվածք: Իհարկե, վերջում մեր տղաները ոչնչացնում են նրանց»,- նշում է Վարդան Պողոսյանը:

Հայրը ասաց, որ ինքը ևս դիմել էր որպես կամավոր, բայց նրա առողջական վիճակը չի ներել, փոխարենը նա իր սեփական միջոցներով օգնել է տեղի բնակչությանը՝ տեղահանության հարցով:

 Վարդան Պողոսյանը նշեց, որ վերջին անգամ Ալեքսի հետ խոսել է ամսի 27-ի առավոտյան. «Տրամադրությունը շատ լավ էր, ասացի՝ ինչ կա, շատ են խփում, ասաց՝ խփում են, թո‘ղ խփեն: Օրեր շարունակ ամբողջ Հայաստանը ման եմ եկել՝ գիշեր-ցերեկ, ոչ հաց եմ կերել, ոչ քնել եմ ու 13 օր ման գալուց հետո նոր կարողացել եմ գտնել երեխուս՝ Հերացու դիահերձարանում»,- եզրափակեց հերոս Պողոսյան Ալեքսի հայրը:

Զվարթ Պետրոսյան

Այս թեմայով Հարկատուն հերոս չի, ժողովու'րդ, հերոսն այն մարդն է, ով պատրաստ է կյանքը տալ հայրենիքին. Պողոսյան (տեսանյութ) Սրբազան պայքարի հաջողվելուց հետո սպասում ենք հստակ քայլերի՝ արցախցիների հավաքական վերադարձ դեպի Արցախ. հանրահավաքի մասնակից (տեսանյութ) Եզրահանգումը մեկն է․ Սերժ Սարգսյանը ճիշտ է. Վարդան Պողոսյան Գագիկ Ծառուկյանի նախաձեռնությամբ իրականացված «Հայաստան-Արցախ» Համահայկական երիտասարդական ֆորումի աշխատանքը ներկայացվել է տեսաֆիլմով (տեսանյութ) ՀՀ ոստիկանապետի ապօրինի և կոռուպցիոն շղթաների մասով այլ տեղեկատվություն ենք ստացել․ Կարապետ Պողոսյան Շոլցը հայտնել է՝ Ռուսաստանն ամսական քանի զինվոր է կորցնում Ուկրաինայում Մեծ անջրպետ կա հայ ժողովրդի և ՀՀ իշխանությունների շահերի միջև. Օսկանյանը՝ Արցախ վերադարձի մասին (տեսանյութ) Այլևս ոչ մի եկեղեցական բրածեծ չի լինելու, չի թունավորվելու, խեղդամահ չի արվելու, չի աքսորվելու․ Արարատ քահանա Պողոսյան Ոստիկանությունում դժգոհություններ են հասունանում. Աբգար Պողոսյան ՀՀ կառավարությունն Արցախի ժողովրդի վերաբերյալ որոշումները կայացնում է առանց ռազմավարության, նպատակն Արցախի էջը մեկընդմիշտ փակելն է. Արտակ Բեգլարյան