Սևանա լճում սիգի որսի ժամկետը երկարաձգվեց մինչև հոկտեմբերի 15-ը, 50 տոննայով ավելացվեց չափաքանակը

Կառավարությունը փոփոխություններ կատարեց իր երկու որոշումներում, որոնք վերաբերում են Սևանա լճից ձկան արդյունահանմանը:

Շրջակա միջավայրի նախարար Ռոմանոս Պետրոսյանը նշեց, որ այս փոփոխությունների անհրաժեշտությունը բխում է 2021 թվականի մարտի 25-ից մեկնարկած Սևանա լճում սիգի արդյունագործական որսի գործընթացի իրականացման կարգավորման անհրաժեշտությունից։

«2021 թվականին Սևանա լճում արդյունագործական որսի իրականացման համար սահմանված է եղել 250 տոննա չափաքանակ, արդյունագործական որսն իրականացվել է 2021-ի մայիսի 14-ից, կնքվել է 303 պայմանագիր 221 164 կգ  սիգի արդյունագործական որս իրականացնելու համար, որսն իրականացնելու համար սահմանվել և կահավորվել են 25 կետեր,  փաստացի որսն իրականացվել է 19 կետերում։ Որսի իրականացման վերջնաժամկետ է սահմանվել 2021 թվականի սեպտեմբերի 1-ը:

Սահմանված չափաքանակից շուրջ 29 տոննա սիգի համար հայտ չի ներկայացվել: Ներկայացված հայտերի շրջանակներում 2021 թվականի օգոստոսի 30-ի դրությամբ ևս առկա է որոշ չափաքանակ (շուրջ 20 տոննա), ինչը, եղանակային պայմանների պատճառով, պայմանագիր կնքած ձկնորսները չեն հասցրել որսալ մինչև սեպտեմբերի 1-ը»,- ասաց Պետրոսյանը:

Նրա խոսքով՝ արդյունագործական որսի կազմակերպման և իրականացման ընթացքում աշխատանքային կարգով շարունակական քննարկումներ են կայացել շրջակա միջավայրի նախարարի,  Գեղարքունիքի մարզը ներկայացնող ԱԺ պատգամավորների, Գիտությունների ազգային ակադեմիայի, «Սևան» ազգային պարկի, Գեղարքունիքի մարզպետարանի աշխատակիցների, ձկնորսների և այլ շահագրգիռ անձանց հետ ընթացքում ծագած խնդիրները հասկանալու և դրանց լուծման համար անհրաժեշտ փոխհամաձայնեցված տարբերակի  որոշման ուղղությամբ։

Քննարկումների արդյունքում առաջարկվել է որսի ժամկետները սեպտեմբերի 1-ը սահմանելու վերաբերյալ ձկնորսների կողմից հնչեցված դժգոհությունների, ինչպես նաև առկա սոցիալական խնդրի կարգավորման նպատակով վերանայել օգտագործման համար սահմանված չափաքանակը և պայմանագրերի գործունեության ժամկետները։

«Առաջարկը առանձին քննարկվել է նաև ԳԱԱ կենդանաբանության և հիդրոէկոլոգիայի գիտական կենտրոնի գիտնականների հետ և ձեռք է բերվել համաձայնություն 2021 թվականի համար սիգի արդյունագործական նպատակներով չափաքանակը ավելացնել ևս 50 տոննայով և որսի իրականացման ժամկետը երկարաձգել մինչև ս.թ. հոկտեմբերի 15-ը՝ հնարավորություն ընձեռելով օրինապահ ձկնորսներին սահմանված կարգավորումներին համապատասխան իրականացնել սիգի արդյունագործական որս»,-ասաց նախարարը:

Այս թեմայով Փրկարարները Սևանա լճից դուրս են բերել քաղաքացուն, որը չէր կարողանում ինքնուրույն վերադառնալ ափ Առաջին անգամ Սևանա լճում փրկարարներին կօգնեն նաև անօդաչու թռչող սարքերը Սևանա լճում ջրի ծաղկման ինտենսիվության թուլացում է նկատվում Սևանա լճի մակարդակը հուլիսին կլինի ամենաբարձրը վերջին 60 տարվա ընթացքում Սևանա լճում ձկնորսությամբ զբաղվողները կտուգանվեն՝ պայմանագրեր չունենալու դեպքում Իրականացվել է Սևանա լճում ջրի որակի հետազոտություն՝ 16 դիտակետում