Սուրբ Ծննդյան տոնը չպետք է աղճատվի չգիտության արդյունքում. Ասողիկ աբեղա Կարապետյան

Մայր Աթոռ Սուրբ Էջմիածնի Արխիվի և Թանգարանների տնօրեն Ասողիկ աբեղա Կարապետյանը ֆեյսբուքյան գրառմամբ անդրադարձել է կառավարության ներկայացրած և ԱԺ առաջին ընթերցմամբ ընդունված «ՀՀ տոների և հիշատակի օրերի մասին» օրենքում փոփոխություններ կատարելու մասին օրենքի նախագծին, որով առաջարկվել է հունվարի 2-ը, 3-ը, 4-ը, 5-ը և 7-ը սահմանել աշխատանքային օրեր և, մասնավորապես, էկոնոմիկայի նախարար Վահան Քերոբյանի հայտարարություններին:

Նա, մասնավորապես, գրել է.

«ՄԻ ԱՂՃԱՏԵՔ ՏԵՐՈՒՆԻ ՏՈՆԸ

Մեկընդմիշտ ամեն ոք, մանավանդ իշխանավոր անձինք, պետք է ըմբռնեն, որ Եկեղեցին ու Պետությունն իրարից անջատ չեն. միմյանցից զատված են աշխարհիկ և հոգևոր իշխանությունները: Պետությունն այն տունն է, որի ներքո կան և գործում են Ազգն ու ազգային կառույցները: Հետևաբար, երբ իշխանությունները ցանկանում են Պետության համար որևէ կարգ և օրենք սահմանան՝ պարտավոր են լսելու Պետության ազգային կառույցների խոսքը և հաշվի նստելու նրանց հետ, ի մասնավորի՝ ազգային միեղեն հոգևոր ինստիտուտ Հայաստանյայց Առաքելական Սուրբ Եկեղեցու:

Ամանորյա տոնական օրերին միաձուլված են Սուրբ Ծննդյան և Աստվածհայտնության տոնի մի քանի օրեր (այս տոնը Հայոց Եկեղեցին տոնակատարում է 8 օր): Հետևաբար, երբ կրճատվում են ամանորյա տոնական օրերը՝ հարգարժան նախարար Տիար Վահան Քերոբյանը պետք է մասնավոր կերպով հանդիպեր և խորհրդակցեր Ազգային եկեղեցու հետ՝ լսելով աստվածաբան-տոնագետների կարծիքը, որից հետո իր թիմով ձևեր աշխատանքային օրերը կրճատելու նախագիծը:

Ողջ եկեղեցական տոնացույցում միմիայն երկու տոն կա, որոնք ունեն Ճրագալույց-նախատոնակ՝ Սբ Ծնունդ և Սբ Հարություն: Եթե Սբ Հարությունն անշարժապես տոնախմբվում է կիրակի օրը, ապա Սբ Ծնունդն անշարժ է ամսաթվով՝ հունվար 6, ուստի այս տոնի Ճրագալույցը շաբաթվա օրերով փոփոխական է:

Հոգևոր խորհրդաբանությամբ նախատոնակը բուն տոնից զատելը՝ սխալ է, անընդունելի: Այդ օրը հայ քրիստոնյան ազատ պետք է լինի մարմնավոր զբաղմունքից, առավոտից ի վեր պետք է ապրի Տիրոջ ծննդյան խորհրդով, նախապատրաստվի հոգևոր տոնախմբությանը սուրբ տաճարում, որից հետո էլ՝ ընտանեկան հարկում, ողջ ընտանիքով, Ճրագալույցի տոնական ընթրիքին:

Դուք, սիրելի իշխանավոր անձինք, սիրում եք Ձեզ համարել Ազգային եկեղեցու հարազատ զավակներ. կեցցեք, փառք Տիրոջ, գոհություն ենք ապրում, բայց լինելով հարազատ զավակներ և հետևորդներ՝ միաժամանակ գիտցեք նաև ուսանել ու հարգել Ձեր Մայր Եկեղեցու կարգերը, ավանդություններն ու ավանդույթները:

Սիրով և ակնածանքով ունկդիր եղեք Լուսո Խորան Մայր Աթոռի ձայնին, քանզի ձայնն այս արդար ու քաղցր հնչում է բացառապես ի շինություն Ազգիս հայոց և ի պայծառություն մեր Սուրբ Եկեղեցու՝ մեզ ամենքիս:

Հավատացեք, որ այսպես՝ հոգևորապես մաքրագործված ու զորեղացած, մտավորապես ազնվացած ու իմաստնացած, միմիայն այսպես կարող ենք կառուցել լույսի, հույսի և հզոր ՀԱՅԱՍՏԱՆ:

Արդ, կանգ առեք մի պահ և լսեցեք, մանավանդ Դուք՝ հարգարժան պատգամավորներ Ազգային ժողովի, որպեսզի սխալ չգործեք, որպեսզի չդավեք Ձեր հոգևոր ծնողին՝ Եկեղեցուն Հայկական. Սուրբ Ծնունդն սկիզբն է հայ քրիստոնյայի բարեպաշտության, այդ տոնը չպետք է աղճատվի չգիտության արդյունքում»։ 

Այս թեմայով Ճանապարհդ հարթ լինի. Սուրբ Աննայի բակում Սրբազանը ողջունում և օրհնում է քաղաքացիներին (տեսանյութ) Այսօր Կաթողիկե Սուրբ Էջմիածնի տոնն է Սրբազանի կողմնակիցների մեքենաներն «ազատ արձակվեցին»` բանակցությունների արդյունքում (տեսանյութ) Սրբազանը կարևոր «մեսիջ» ունի, որ այս հարցը պետք է լուծել հիմա, սա չպետք է թողնենք սերունդների վրա (տեսանյութ) Պոլսո Հայոց պատրիարքարանն իր զորակցությունն է հայտնում Մայր Աթոռ Սուրբ Էջմիածնին Բերետները ծաղրաբար «հայր սուրբ», «հայր սուրբ» ասելով դաժան ծեծի են ենթարկել Դանիել սարկավագին ՀԻՄԱ․ ակցիայի մասնակիցները Բագրատ Սրբազանի առաջնորդությամբ երթով շարժվում են դեպի «Սուրբ Աննա» եկեղեցու բակ ՈՒՂԻՂ․ Սրբազանի կոչով քաղաքացիները «Սուրբ Աննա» եկեղեցու բակում են Առևանգված Բաբկեն Ասրյանին ազատ արձակեցին Սուրբ Հովհաննես Կարապետի մասունքը տարվել է Շողակաթի վանք