Նիկոլ Փաշինյանը և թիմակիցները հեղափոխությունից հետո մեկը մյուսի հետևից մեգանախագծերի անոնս էին անում և տպավորություն էր, որ Հայաստանը դառնալու է մի մեծ շինհրապարակ, ժողովուրդն էլ ի վերջո կունենա բաղձալի նոր աշխատատեղերը: Սակայն, հեղափոխությունից 5 տարի անց կարող ենք ամփոփել և եզրակացնել, որ Փաշինյանի և մյուս ՔՊ-ականների կողմից հանրությանը ներկայացված նախագծերից գրեթե ոչ մեկը այդպես էլ կյանքի չկոչվեց: Բացի այդ, սառույցին գրված մեգա նախագծերից, ՔՊ-ականները նաև անում են հայտարարություններ, որոնցից, մեղմ ասած, պոպուլիզմի հոտ է գալիս:
Հայաստանում 10-15 միլիարդ դոլարի ներդրում պետք է արվեր այսպես կոչված` խելացի քաղաքների կառուցման համար։ Այս հարցը գտնվում էր այն ժամանակվա ԲՏԱ նախարար Հակոբ Արշակյանի կուռացիայի ներքո, սակայն, որ աստղաբաշխական ներդրումներին ականատես եղանք, ոչ առավել ևս այս կայսերական ծրագրի իրականացմանը։
Արարատի նախկին մարզպետ Գարիկ Սարգսյանի խոսքով՝ 2020թ-ին մարզում պետք է իրականացվեին մի շարք ծրագրեր՝ ուղղված բիզնեսի, առողջապահության, կրթության ոլորտներին: Այն ժամանակվա մարզպետը նշել էր, որ գործարարի կողմից Երևան-Մխչյան ավտոճանապարհի վրա նախատեսվում է կառուցել 11 հեկտար մակերեսով գյուղմթերքի մանրամեծածախ շուկա, որի կառուցման համար կներդրվի $4.5 մլն: Թե ինչ եղավ հետո` անչափ հուզիչ էր: Դե իսկ հայտնի և մեմ դարձած կոկորդիլոսաբուծարանի մասին ընդհանրապես ավելորդ է հիշեցնել:
Էկոնոմիկայի նախարար Վահան Քերոբյանը նույնպես աչքի է ընկնում էքստրավագանտ խոստումներով։ Դրանցից մեկը Գյումրիում նյույորքցի Թոդդ Ֆաբաքերի ներդրմամբ՝ «Դիստրիկտ» էկո թաղամաս կառուցելու, մյուսը՝ «չոր նավահանգիստ» կամ արդյունաբերական պարկ հիմնելու մասին էր, որի հեղինակը ՀՀ կառավարությունն է։ Ի դեպ, գյումրեցիները տևական ժամանակ է՝ լսում են Վահան Քերոբյանի այս ծրագրի մասին, երբեմն ժպտում, ինչպես ժպտում էին ու հումոր անում Գյումրիում թռչող տրամվայի (Սքայ Գյումրի) ծրագիրը քննարկելիս։
ՔՊ-ական պատգամավոր Վահագն Ալեքսանյանը հայտարարում էր, որ մեկ տարում ամբողջությամբ կլուծվի աղետի գոտին դոմիկներից ազատելու հարցը, որը, իհարկե, չլուծվեց․
Թերևս ամենափիառված նախագիծը, որը այս տարիների ընթացքում առաջ են բրդում իշխանությունները, Աջափնյակի մետրոյի նոր կայարանի կառուցումն է: Այդ խոստումը տալիս էին Հայկ Մարությանը, Հրաչյա Սարգսյանը, իսկ այժմ նրանց է միացել Տիգրան Ավինյանը: Մինչդեռ մետրոյի կայարանից դեռևս որևէ լուր չկա և հասկանալի չէ՝ այն կառուցվելու է ընդհանրապես, թե ոչ:
Մեկ տարի առաջ ԲՏԱ նախարար Ռոբերտ Խաչատրյանը հայտարարեց, որ Հայաստանը տիեզերք է արձակել իր առաջին արբանյակը և շուտով հանրությանը կներկայացվեն նրա կողմից արված առաջին լուսանկարները: Մինչ այս պահը այդ լուսանկարները հանրությունը այդպես էլ չտեսավ:
Ամիսներ առաջ ԱԺ-ում ՔՊ-ական պատգամավորներ Գևորգ Պապոյանը և Բաբկեն Թունյանը, մեկը մյուսին հերթ չզիջելով, փորձում էին համոզել, որ հայ-թուրքական սահմանի բացումը որևէ ապոկալիպտիկ հետևանք չի ունենալու, հակառակը՝ սահմանների բացումը նոր զարկ է տալու տնտեսության զարգացմանը, նոր աշխատատեղեր են ստեղծվելու, մարդիկ էլ սկսելու են ավելի լավ ապրել: Ընդհանրապես, ցանկացած նման հայտարարություն պետք է համեմված լիներ վստահություն ներշնչող թվերով, վերլուծություններով, որոնք կապացուցեին վերը նշված խոսքերի իսկությունը: Մինչդեռ ՔՊ-ական պատգամավորները մինչ այս պահը չեն բերել գեթ մեկ լուրջ հետազոտություն՝ ի հիմնավորումն իրենց գեղեցիկ բաժակաճառերի: Փոխարենը՝ առկա են բազմաթիվ վերլուծություններ, որոնք խոսում են այն մասին, որ հայ-թուրքական սահմանի բացումը հանգեցնելու է հայ արտադրողի շահերի լրջագույն ոտնահարման և, ընդհանրապես, Հայաստանի տնտեսության կլանմանը: Շատերի կարծիքով՝ այդ սցենարի իրականացման դեպքում Հայաստանի տնտեսությանը սպառնում է այսպես կոչված` բաթումիզացիա: Ինքը՝ Գևորգ Պապոյանը, ընդունում է, որ հարյուրապատիկ անգամ ուժեղ հարևանի հետ չպետք է թշնամություն անել: Իսկ կա՞ երաշխիք, որ այդ հարյուրապատիկ անգամ ուժեղ և հատկապես տնտեսապես ուժեղ հարևանը չի կլանի քո թույլ և արտաքին վարկերով գոյատևող տնտեսությունը:
ՔՊ-ական պատգամավոր Զառա Բաթոյանը երեկ գրառում է արել, որտեղ իր մտահոգությունն է հնչեցրել կալանավայրերում պահվող կանանց իրավունքների խախտման դեպքերի առթիվ: Նա, մասնավորապես, գրել է, որ յուրաքանչյուր ոք ունի բժշկական խորհրդատվություն և ծառայություններ ստանալու իրավունք վերարտադրողական և սեռական առողջության հարցերի շուրջ՝ մեկուսի ու գաղտնի պայմաններում: Կանանց իրավունքների պաշտպանության մեկ էլ առաջամարտիկ էլ ՔՊ-ական պատգամավոր Լենա Նազարյանն է: Մինչ հեղափոխությունը և դրանից հետո էլ նա բառի բուն իմաստով ակտիվիստ էր և հայտարարում էր, որ կանանց իրավունքները անտեսելու այլևս որևէ իրավունք չունենք: Շատ լավ է, որ Զառա Բաթոյանը հետաքրքրված է կալանավայրերում պահվող կանանց բժշկական խորհրդատվություն և ծառայություններ ստանալու իրավունքով, շատ լավ է, որ Լենա Նազարյանը ևս կանանց իրավունքների պաշտպանության առաջամարտիկ է, սակայն առնվազն տարակուսելի է, որ վերջիններս բառ անգամ չէին ասել հանուն հայրենիքի պաշտպանության նահատակված զինվորի մորը կալանավորելու վերաբերյալ:
Ամենադիտված 
Որոնվում են մայրն ու 5 երեխաները. նրանք տաքսիով մեկնել են Երևան, իջել և հեռացել անհայտ ուղղությամբ
