«Ալավերդցի Վահագ»-ին ազատությունից զրկելու կարգադրությունը ապօրինի է եղել. փաստաբան

Ալավերդի քաղաքի բնակիչ Կամո Փիրուզյանի սպանությունը պատվիրելու համար մեղադրվող քրեական հեղինակություն համարվող Վահագն Աբգարյանի (Ալավերդցի Վահագ) և Վլադիմիր Դավթյանի (Վլե) գործով փաստաբան Ալեքսանդր Սիրունյանը ԼՈՒՐԵՐ.com-ի հետ զրույցում ասաց, որ ՀՔԾ մինչդատական վարույթի օրինականության նկատմամբ հսկողության վարչության պետ Արսեն Մարտիրոսյանը ապօրինի կարգադրություն է տվել Հայաստանի Հանրապետության ոստիկանության պետի առաջին տեղակալ Արթուր Մարտիրոսյանին:

Ըստ փաստաբանի տեղեկությունների՝ Արսեն Մարտիրոսյանը դատական ակտ կատարող չհանդիսացող ՀՀ ոստիկանությանը տվել է կարգադրություն՝ իր երևակայած դատական ակտը կատարելու և քրեական գործով ամբաստանյալ Վահագն Աբգարյանին ազատությունից զրկելու մասին:

«Արսեն Մարտիրոսյանը, չնայած դատավարական որևէ կապ չունի հիշյալ քրեական գործի հետ, անտեսել է, որ Քրեական դատավարության օրենսգրքի համաձայն դատական ակտ կատարելու մասին կարգադրությունը արձակում է դատարանը և նույն օրենսգրքի 430 հոդվածի համաձայն՝ դատական որոշման հետ կապված անհստակությունները նույնպես մեկնաբանում է դատարանը, մեկնաբանել է Քրեական վերաքննիչ դատարանի որոշումը»,- նշում է փաստաբանը և հավելում, որ Արսեն Մարտիրոսյանի՝ թվարկված գործողությունները Քրեական օրենսգրքի մի շարք հոդվածներով արգելված արարքների հատկանիշներ են պարունակում:

Հիշեցնենք, որ քրեական գործում Վահագն Աբգարյանը մեղադրվում է ապօրինի կերպով ռազմամթերք հանդիսացող փամփուշտներ, ակոսափող հրազեն հանդիսացող 2 ատրճանակներ ձեռք է բերելու և դրանք ապօրինի պահելու, նաև, Կամո Փիրուզյանի սպանությունը կազմակերպելու, Թաթուլ Շուշանյանին առանձնապես խոշոր չափերով, իսկ Արտակ Հովհաննիսյանին՝ խոշոր չափերով կաշառք տալու մեջ: Նրան մեղադրանք է առաջադրվել միաժամանակ 6 հոդվածների հատկանիշներով: