Առողջապահության նախարարությունը գաղտնի 15 մլն դոլար է ծախսել

Կորոնավիրուսի տարածումը կանխարգելելու նպատակով բացված գանձապետական հաշվեհամարին փոխանցվել է 1 միլիարդ 105 դրամ գումար: Այս մասին ԼՈՒՐԵՐ.com-ին հայտնում են վարչապետի աշխատակազմից եւ ավելացնում, որ հաշվեհամարի պատասխանատու մարմինը առողջապահության նախարարությունն է: Թե բարերարներից եւ քաղաքացիներից հավաքված այս հսկայական գումարներն ինչպես են ծախսվել, կառավարությունից, մեղմ ասած, ոչինչ չասող պատասխան են փոխանցել: Մեզ տրամադրած գրավոր պատասխանում նշված է, որ ՀՀ կառավարության որոշումների համաձայն, պահուստային ֆոնդի միջոցներից գումարներ են հատկացվել ՀՀ առողջապահության նախարարությանը 1003-11006 ծրագիր-միջոցառումների իրականացման համար, այն է՝ «Հայաստանի Հանրապետությունում կորոնավիրուսային վարակի (COVID-19) կանխարգելման, վերահսկման, բուժման և այլ համալիր միջոցառումների իրականացում»: Առողջապահության նախարարությանը հատկացվել է 1 միլիարդ 35 միլիոն դրամ: Արսեն Թորոսյանի հրամաններով էլ այս գումարներն ուղղվել են վերապրոֆիլավորված բժշկական կենտրոնների պահպանման, բժշկական անձնակազմի աշխատավարձի և պարգևատրման ծախսերի, անհրաժեշտ դեղերի, սարքավորումների, բժշկական նշանակության ապրանքների, իրականացված շինարարական ծախսերի փոխհատուցմանը: Եվ ահա այստեղ է, որ բախվում ենք մեծ խնդրի: Հայտնի չէ, թե նախարարությունը ո՞ր բժշկական կենտրոններին է գումար հատկացրել, որքա՞ն է յուրաքանչյուրին հատկացրել եւ ինչ անհրաժեշտ դեղորայք ու սարքավորումներ է ձեռք բերել: Նշենք, որ այս տվյալները՝ թե որ ԲԿ-ին որքան գումար է հատկացվել, հետաքրքիր է նաեւ նրանով, որ պարբերաբար հնչում էին կարծիքներ, թե կան հիվանդանոցներ, որոնք պատրաստ են կորոնավիրուսաին բուժման ծառայություններ մատուցել, բայց, ըստ այդ լուրերի, նախարարը չէր ցանկանում՝ նախապատվությունը տալով իր հետ բարիդրացիական կապեր ունեցողներին:

ԼՈՒՐԵՐ.com-ը փորձեց գնումների armeps համակարգում, ինչպես նաեւ e-gov.am կայքի «Մեկ անձից կատարվող գնումների» բաժնում ուսումնասիրել, թե նախարարությունը, որ հիվանդանոցների եւ դեղորայք ու սարքավորումներ մատակարարող ընկերությունների հետ պայմանագրեր ունի: Այս հարթակներում, որը լավագույնս ապահովում է պետական գնումների թափանցիկությունը, որեւէ տեղեկատվություն չկար: Իսկ ահա վարչապետի աշխատակազմը հետեւյալ բացատրությունն ունի, թե ծախսված հանրային միջոցների մանրամասները երբ հասարակությանը հասանելի կդառնան: «Հայտնում ենք, որ գլոբալ համավարակի տարածման ներկա զարգացումներով պայմանավորված` վերոնշյալ գործընթացները կրում են շարունակական բնույթ, և ամբողջական, մանրամասն տեղեկատվություն հատկացված գումարների ծախսման ուղղությունների մասին այս պահին հնարավոր չէ տրամադրել: Իրավիճակի կարգավորումից և տվյալների ամփոփումից հետո միայն հնարավոր կլինի տրամադրել լիարժեք տեղեկատվությունը»,- ասված է պաշտնական պատասխանում: Այստեղ ուշագրավ է՝ տվյալների տրամադրման համար որպես ժամանակահատված նշված «իրավիճակի կարգավորումից հետո» ձեւակերպումը: Հնարավոր է, որ այս տեղեկություններն առաջիկա մի քանի տարիների ընթացքում հասանելի չլինեն: Հիշեցնենք՝ առողջապահության նախարար Արսեն Թորոսյանը կորոնաճգնաժամի ավարտի տեսանելի ժամանակահատված կանխատեսել էր հինգ տարի հետո: Նա այս կարծիքը հայտնել էր մայիսի 14-ին ուղիղ եթերի ժամանակ: Ի դեպ, կարեւոր է նաեւ նշել, որ 2020 թվականին պետական բյուջեի վերաբաշխման արդյունքում առավել շատ գումարներ ստացած գերատեսչությունների թվում է նաեւ ՀՀ առողջապահության նախարարությունը: Կառույցն ստացել է 7,4 միլիարդ դրամ կամ ողջ վերաբաշխված գումարի 60%-ը: Այս գումարների ծախսի հետ կապված նախարարությունից էլ ԹԻՀԿ-ին տեղեկություններ չեն տրամադրել: Ի դեպ, սա համարժեք է 15 մլն դոլարի: Անդրադառնալով մարտի 17-ից բացված գանձապետական հաշվեհամարին մուտքագրված 1 միլիարդ 105 դրամ գումարին՝ նշենք նաև, որ գումարներ են հատկացվել ՀՀ ոստիկանությանը` 11 մլն 900 հազար դրամ և ՀՀ քաղաքաշինության կոմիտեին` 1 մլն 300 հազար դրամ` պարգեւավճարների համար: Այս մասին եւս հայտնում են վարչապետի աշխատակազմից: Ի դեպ, նշենք, որ համավարակի այս օրերին կան երկրներ, որոնք մանրամասն ներկայացնում են, թե իրենց առողջապահական համակարգերը կորոնավիրուսի բուժումը կազմակերպելու համար ինչ ծախսեր են արել: Այդ երկրների ցանկում են Մոլդովան, Ուկրաինան, Ղազախստանը, Ղրղզստանը: Ստեղծված իրավիճակի ֆոնին հիշարժան են վարչապետ Նիկոլ Փաշինյանի այն հայտարարությունները, թե այս կառավարությունը նախորդներից տարբերվում է թափանցիկ աշխատելաոճով:

Այս թեմայով Ապրիլի 25-ի դրությամբ հայ–ադրբեջանական սահմանին տեղադրվել է թվով 20 սահմանային սյուն․ ՀՀ կառավարություն Առաջարկվում է պարեկային ծառայության աշխատանքի վարձատրության ֆոնդն ավելացնել տարեկան մոտ 417 միլիոն դրամով. «Փաստ» «Ժողովուրդ». 36 կգ ոսկու եւ 293 միլիոն ռուբլու անհետացման գործով վկայի կարգավիճակում դատավոր է հարցաքննվել Ինչպես Կառավարության շենքից «անհետացան» Տավուշի սահմանամերձ համայնքների ղեկավարները (տեսանյութ) Տավուշի վարչական ղեկավարները կանչվել են կառավարություն. Բագրատ Սրբազան Սփյուռքում դրա դիմաց խալիներ փռող, Ցեղասպանություն վերապրածների ժառանգներ, լա՞վ եք. Ռուբեն Մխիթարյան Կա էդ 1 ու կես միլիոն նահատակների տվյալները` պատգամավորին հիշեցնում են «Գործ թիվ 1 500 000» գիրքը Ասել ու կրկին ասում եմ` Հայաստանում չի կարող լինել երկրորդ կառավարություն. Փաշինյան ԼՂ նախկին վերնախավը չի հրաժարվում թշնամական հարվածների փարոսիկի դերից. ՀՀ-ում մեկ կառավարություն կա Իլոն Մասկը հայտնել է, որ մոտ մեկ միլիոն մարդ կարող է ուղարկվել Մարս