Ադրբեջանցին ամեն մի կով տանելուց մեզ վրա մի 3 ժամ հռհռում է. Շուռնուխի գյուղապետ

Անհետացած կովերից ոչ մի նորություն չունենք, Շուռնուխում անհասկանալի և անորոշ իրավիճակ է: Դիմել ենք սահմանապահներին, իրենց պատասխանն էլ անփոփոխ է, ասում են՝ մենք էլ ենք սպասում: Այս մասին ԼՈՒՐԵՐ.com-ի հետ զրույցում ասաց Շուռնուխի գյուղապետ Հակոբ Արշակյանը:

Նա նշեց, որ թեև սպասում են սահմանապահների և մարզպետարանի կողմից որևէ արձագանքի, բայցև հույս չունեն, որ այն դրական կլինի: Այն, որ արդեն երկրորդ անգամ է՝ Շուռնուխից անասունների անհետացման դեպք է գրանցվում, ըստ գյուղապետի, առաջին հերթին անասնապահների մեղքն է. «Անասունին նախ պետք է տեր կանգնի անասնատերը: Ամեն մեկն իր բացթողումն ունի, բան չունեմ ասելու, բայց սկզբից դու ինքդ պետք է քո ապրանքը հսկես, նոր մեղավորներ փնտրես. ռուս խաղաղապահին ու սահմանապահին են մեղադրում, իրենք ի՞նչ անեն, գյուղի անասունների համար չոբան աշխատե՞ն»,- ասաց Հակոբ Արշակյանը՝ հավելելով, որ Գավրուշի կովերի անհետացումից օրեր անց, նրա մնացած անասունները նորից այդ նույն մայրուղու վրա էին:

Այստեղ գյուղապետը գյուղացիների կողմից հնարավոր դիտավորություն նկատեց. «Ես չեմ հասկանում դիտավորյալ են անո՞ւմ, ի՞նչ երաշխիք ունեն, որ կառավարությունը կփոխհատուցի նրանց կրած վնասը: Երևի մտածում են, որ իրենց կովը ամենաշատը կարող են վաճառել 150.000 դրամով, դրա փոխարեն կտան թուրքերին, կառավարությունն էլ կգա, կփոխհատուցի 300.000 դրամի չափով»,- ընդգծեց գյուղապետը:

Վերջինս նկատեց, որ իր համար գերխնդիր է ոչ թե փոխհատուցում ստանալը, այլ այն, որ ադրբեջանցին ծաղրում է նրանց. «Ադրբեջանցին ամեն մի կով տանելուց մեզ վրա մի 3 ժամ ծիծաղում ու հռհռում է, այստեղ հարցը փոխհատուցումը չէ, այլ՝ ամոթն է, որ մեր կովն անցնում է իրենց սահմանը»,- ասաց Հակոբ Արշակյանը չբացառելով, որ վաղն էլ կովի փոխարեն կարող է երեխա լինել, որը կհատի սահմանը կամ արբած մարդ. «Շուռնուխում անհանգստանալու շատ բաներ կան, ամեն ինչ հնարավոր է, պետք է նախ դու ինքդ զգուշավորություն ցուցաբերես»,- ասաց նա:

Ըստ գյուղապետի՝ բոլոր տեսակի խնդիրները կլուծվեն միայն այն ժամանակ, երբ ադրբեջանցիները ետ քաշվեն իրենց գյուղից. «Եթե ոչ 3 կամ 5 կմ, ապա գոնե 1 կմ ետ քաշվեն մեր գյուղից, բավարար կլինի մեզ համար: Այդ դեպքում այլևս ոչ ոք ու ոչինչ չի կորի՝ ո՛չ կովը, ո՛չ կինը, ո՛չ էլ երեխան»,- եզրափակեց գյուղապետը:

Հիշեցնենք, որ օրեր առաջ էլ Շուռնուխի բնակիչ Գավրուշ Հակոբյանի՝ 13 կովերն էին անցել թշնամու հսկողության տակ գտնվող տարածք։ 

Զվարթ Պետրոսյան

Այս թեմայով Շուռնուխցիներին խաբած իշխանությունները հիմա էլ տավուշցիներին են «խոստումներ» տալիս Երթուղային ավտոբուսները շաբաթական 2 անգամ Գորիսից կմեկնեն Որոտան, Բարձրավան և Շուռնուխ Ցավալիորեն Շուռնուխը գտնվում է թշնամու դիտակետում և բախվել է անվտանգային մի շարք խնդիրների. ՔՊ-ական պատգամավոր Գնել Սանոսյանն այցելել է Շուռնուխ, Բարձրավան և Որոտան բնակավայրեր Շուռնուխում դիտարկվել է նոր թաղամասի կառուցման ընթացքը Սահմանամերձ Շուռնուխ գյուղում 4 ընտանիք բնակարան է ստացել «Չայզամի» կոչվող տարածքում ադրբեջանցիները մոտ 800 մետր հետ են քաշվել ճանապարհից. Շուռնուխի գյուղապետ Որոտանում և Շուռնուխում ունեցվածքը կորցրած քաղաքացիներին տրամադրվել է հավելյալ 68 հազար դոլար Տանձավեր-Շուռնուխ նոր կառուցվող ճանապարհի շինաշխատանքներ կատարելիս վնասվել է գազատար խողովակը․ ՏԿԵՆ «Ժողովուրդ». «Շուռնուխում անգամ բուժկետ չկա, Որոտանն էլ ջրի խնդիր ունի»