«Պատվաստումների գործընթացի ակտիվություն է նկատվում»․ որ պատվաստանյութով պատվաստվել

Armenia 5 May, 2021 16:47

Հայաստանում պատվաստումների մեկնարկից մինչև մայիսի 4-ը ներառյալ պատվաստվել է 5880 քաղաքացի։ Այս մասին ԼՈՒՐԵՐ․com-ի հետ զրույցում ասաց ՀՀ առողջապահության նախարարի մամուլի քարտուղար Հռիփսիմե Խաչատրյանը:

Նա նշեց, որ իրենք առանձին վիճակագրություն չեն կարող տրամադրել, թե քանի քաղաքացի է պատվաստվել «Աստրազենեկա»-ով, քանիսը՝ «Սպուտնիկ-Վ»-ով․ «Ինչ վերաբերում է չինական «ԿորոնաՎակ» պատվաստանյութին, ապա այն մաքսազերծման և բաշխման գործընթացի մեջ է, հույս ունենք, որ հաջորդ շաբաթվանից առաջին օղակը կունենա այդ պատվաստանյութը»,- նշեց խոսնակը։

Նրա խոսքով՝ պատվաստումների գործընթացի ակտիվություն արդեն նկատվում է, հատկապես, պաշտոնյաների պատվաստվելուց հետո․ «Պատվաստումների գործընթացի ակտիվություն արդեն զգացվում է, հիմա շարժական կայաններ էլ կան քաղաքում և մեծ առևտրի կենտրոններում, որտեղ մարդիկ կարող են մոտենալ նախնական բուժզննություն անցնել և հենց տեղում պատվաստվել նույն ձևով, ինչպես արվում է պոլիկլինիկաներում»,- ասաց նա։

Անդրադառնալով համացանցում տարածված խոսակցություներին, թե «Սպուտնիկ-Վ»-ով պատվաստվում են միայն պաշտոնյաները, խոսնակը դրանք ծիծաղելի որակեց․ «Դա հերյուրանք է, եթե «Սպուտնիկ-Վ»-ով պատվաստվում են միայն պաշտոնյաները, այդ դեպքում մեր նախարարներն ու կառավարության անդամները ինչո՞վ պատվաստվեցին, բնականաբար՝ «Աստրազենեկա»-ով։ Նույնիսկ անիմաստ է այդ մասին խոսելը»,- նշեց Խաչատրյանը։

Թե ինչ սկզբունքով են քաղաքացիները պատվաստվում այս կամ այն պատվաստանյութով՝ հարցին ի պատասխան Առողջապահության նախարարի մամուլի քարտուղարը նշեց՝ դա արվում է ըստ ցուցումի։ Նշենք, որ սկզբնական շրջանում որոշվել էր, որ «Աստրազենեկա»-ով կարող են պատվաստվել միայն 55-ից բարձր տարիքային խմբի ռիսկային գոտում գտնվող քաղաքացիները, սակայն հետո որոշվեց, որ ցանկության դեպքում պատվաստվելու հնարավորություն կստանան նաև 18-54 տարեկան քաղաքացիները, որոնք ռիսկային խմբում չեն: 55 տարեկանից հետո արվում է «Սպուտնիկ-Վ»։ Հռիփսիմե Խաչատրյանի խոսքով՝ չինական «ԿորոնաՎակ» պատվաստանյութի օգտագործումը ևս ազատականացված է լինելու, այսինքն՝ 18 տարեկանից սկսած կարող են պատվաստվել:

Նկատի ունենալով, որ պատվաստումների մեկնարկից՝ մայիսի 3-ը ներառյալ, 4786 պատվաստում է իրականացվել, կարող ենք արձանագրել, որ մեկ օրում պատվաստվողների թիվը կազմել է 1094։

Հիշեցնենք՝ մայիսի 3-ին պատվաստվել են նաև Նիկոլ Փաշինյանը և իր կինը՝ Աննա Հակոբյանը: Չնայած Փաշինյանը չէր հայտնել, թե ինչ պատվաստանյութով է պատվաստվել, լրատվականներից մեկը պարզել էր, որ դա եղել է ռուսական «Սպուտնիկ-Վ»-ն: Փաշինյանը նաև հայտնել է, որ փոխվարչապետներից մեկը պատվաստվել է «Աստրազենեկա»-ով, մյուսը՝ «Սպուտնիկ-Վ»-ով։ Այսօր արդեն հայտնի դարձավ, ոչ չինական «ԿորոնաՎակ»-ով է պատվաստվել ԱԺ փոխխոսնակ Լենա Նազարյանը։

Սոնա Հարությունյան