Բժիշկները բաց նամակ հանձնեցին ՀՔԾ պետին

Հատուկ քննչական ծառայության շենքի դիմաց բողոքի ակցիա են իրականացնում բժիշկները՝ պահանջելով ազատ արձակել հայտնի բժիշկ, «Իզմիրլյան կենտրոն» ԲԿ-ի տնօրեն Արմեն Չարչյանին։

Հիշեցնենք, որ Երևանի ընդհանուր իրավասության դատարանի որոշմամբ Արմեն Չարչյանը մեկ ամսով կալանավորվել է։

Բժիշկ Սամվել Սահակյանը, որ օրեր առաջ գլխավոր դատախազության, կառավարության, արդարադատության նախարարության շենքերի դիմաց ընթերցեց այդ մարմիններին ուղղված նամակները, այսօր լրագրողների հետ զրույցում ասաց՝ պատասխան չեն ստացել, բայց ակնկալում են գործողություններ։

«Թող օգնեն, որ մենք կարողանանք մեր գործով զբաղվել։ Այստեղ հավաքվածների թվում  պատերազմի մասնակիցներ կան, եղել ենք խրամատում, թաքցրել ենք, որ բժիշկ ենք, մի քանի օր անց պարզվել է, որ մեր կարիքը կա որպես բժիշկ, ինչից հետո մենք տեղափոխվել ենք խրամատից նկուղ»,-ասաց Սահակյանը։

Նա նշեց, որ պատերազմը խելագարության նման է, այդ օրերի մղձավանջն օգնում են մոռանալ իրենց ուսանողները, ապաքինվող հիվանդները։ Արմեն Չարչյանի կալանավորումը նորից խաթարել է գործընկերների անդորրը։ Սահակյանը խնդրեց  ազատ արձակել Չարչյանին, թույլ տալ իրենց վերադառնալ բնականոն աշխատանքի։

««Իզմիրլյան» ԲԿ-ն աշխատում է նույն լարվածությամբ, չի խաթարվել աշխատանքը։ Հետաքրիրք է, որ այսօր էլ Արմեն Չարչյանի դռան դիմաց հերթեր են գոյանում»,-ասաց նա։

Բժիշկները ՀՔԾ դիմաց իրավապահ մարմիններին հորդորեցին, հաշվի առնելով իրենց գործընկերոջ առողջական վիճակը, խափանման միջոցը փոխել։ Համարում են, որ Չարչյանը որևէ  անօրինական բան չի արել։

Վնասվածքաբան Համլետ Ստեփանյանը խոստովանում է, որ կյանքում առաջին անգամ բժշկի խալաթով փողոց է դուրս եկել, հույս ունի՝ արդարությունը կհաղթի։

«Թող արդարությունը հաղթի, մեր ուսուցիչը, պրոֆեսորը, որ Հայաստանի բացարձակ արժեքներից մեկն է, երևի չեք գտնի մի մարդ, որի հարազատին, բարեկամին բուժած չլինի։ Նրան անազատության մեջ պահելն անարդար է»,-ասաց բժիշկը։

Այսօր բժիշկների նամակի հասցեատերը ՀՔԾ պետ Սասուն Խաչատրյանն է։

«Երեկվանից պրոֆեսոր Չարչյանի առողջական վիճակն ավելի է վատացել, որը չի կարող ազդեցություն չունենալ մեր՝ Հայաստանի բժշկական հանրության վրա։ Մենք վերջին ճիգերն ենք գործադրում մեծ սիրով ու հոգով բուժել հիվանդին, կռիվ տալ հիվանդության դեմ ի շահ ժողովրդի, բայց մեր ուժերը լքում են մեզ։ Բայց մենք չենք ուզում պարտվել։ Պարոն Խաչատրյան, խնդրում ենք, արեք ամեն բան, որ հիվանդության դեմ կռվում հաղթողը լինենք մենք։ Մեծահոգությունը հզորացնում է մարդուն, եղեք հզոր, արեք ամեն բան, որ պարոն Չարչյանը լինի ազատության մեջ։ Մենք հավատում ենք ժողովրդավարությանը, արդարադատությանը, մարդասիրությանը»,-նամակն ընթերցեց Սահակյանն ու նշեց՝ բժշկական համայնքը երաշխավորում է, որ Չարչյանը չի խոչընդոտի քննությանը, չի խուսափի վարույթն իրականացնող մարմնին ներկայանալուց։

Նրանք նշեցին, որ իրենց զանգահարում են ու աջակցություն են հայտնում օտարերկրացի ակադեմիկոսներ, Արցախում վիրավորված ու Չարչյանի նշտարով բուժված զինծառայողները, պատասխանում են, որ Հայաստանում արդարադատություն կա, մեծահոգություն ու չկա փոքրոգություն։

«Պարոն Խաչատրյան, այնպես արեք, որ մեզ խաբված չզգանք»,-ամփոփեց նամակի ընթերցանությունը բժիշկ Սահակյանն ու այն հանձնեցին ՀՔԾ։

Այս թեմայով «Հրապարակ». Արմեն Չարչյանն իր «կլիչկան» է ունեցել գաղութում Շաքարային դիաբետի այդ ձևն անհամատեղելի է կալանքի հետ. Արմեն Չարչյանի պաշտպան Արմեն Չարչյանի առողջական վիճակն ուսումնասիրելու հարցով հանձնաժողով է ստեղծվել ՀՀ իշխանություններն ունեն նպատակ ամեն գնով պրոֆեսոր Չարչյանին երկար պահել բանտում. փաստաբան Բժիշկ Արմեն Չարչյանի վիճակը ծանր է Պրոֆեսոր Արմեն Չարչյանի գործով հրատապ նիստ է հրավիրվել․ ՈՒՂԻՂ Չարչյանի վիճակը կտրուկ վատացել է, եկել ենք հիվանդանոց հասկանալու նրա առողջական վիճակը. Սաղաթելյան «Հրապարակ». Օրենքը չի պարտադրում բոլոր մեղադրյալներին կալանավորել «Հայաստան» դաշինքը հայտարարություն է տարածել Արմեն Չարչյանի առողջական վիճակը կտրուկ վատացել է