«Կան շինարարներ, որոնք նոր խողովակ ասվածը հասկանում են ներկած խողովակ». Սանոսյան
Տեսանյութեր«Նախագծով առաջարկվում է ՀՀ համայնքների սոցիալական և տնտեսական ենթակառուցվածքների զարգացմանն ուղղված սուբվենցիոն ծրագրերի շրջանակներում 2020-2021թթ. իրականացված կամ իրականացման փուլում գտնվող 36 համայնքում 40 ծրագրի համար հատկացնել 885 մլն 178 հազար դրամ». Այս մասին այսօր՝ դեկտեմբերի 2-ին, կառավարության նիստում ասաց ՀՀ տարածքային կառավարման և ենթակառուցվածքների նախարար Գնել Սանոսյանը:
«40 ծրագրով նախատեսված աշխատանքները համայնքներն իրենց մասով ֆինանսավորել են, և պետության ֆինանսավորման անհրաժեշտություն է առաջացել։ Ընդհանուր գումարը 1 մլրդ 872 մլն է, որից 885 միլիոնն է պետության մասնաբաժինը և ըստ մարզերի հետևյալ բաշխվածությունն ունի. Արարատի մարզում 7 ծրագրի համար 9 մլն դրամ, Արմավիրի մարզում 7 ծրագրի համար՝ 241 մլն, Գեղարքունիքի մարզում 6 ծրագրի համար 256 մլն, Կոտայքի մարզում 8 ծրագրի համար 152 մլն դրամ, Լոռու մարզում 9 ծրագրի համար 147 մլն դրամ և Շիրակի մարզում 3 ծրագրի համար 18.5 մլն դրամ»,-նշեց Գնել Սանոսյանը։
Վարչապետը նախարարից հետաքրքրվեց, թե որքանո՞վ ենք համոզված, որ սուբվենցիոն ծրագրերը պատշաճ որակով են իրականացվում, Սանոսյանը պատասխանեց.
«Լրջագույն ուշադրություն ենք դարձնում շինարարության որակին, և նախարարությունն ունի համապատասխան աշխատակիցներ, որոնք մարզային և տեսչական գործընկերների հետ այցեր են կատարում համապատասխան շինհրապարակներ։ Դեպքեր ունենք, երբ հայտնաբերվել են նախագծային թերություններ։ Ունենք դեպքեր, որոնք շտկելի են և շինարարներին տրվում է ժամկետ, որ շտկվեն։
Եթե այն նորմերը, որոնք նախատեսված են, չբավարարվեն, ապա այդ դեպքում շինարարները չեն վճարվի։ Ցավոք սրտի մեր երկրում դեռ կան շինարարներ, որոնք նոր խողովակ ասվածը հասկանում են ներկած խողովակ։ Փորձում ենք նման դեպքերը թույլ չտալ»,-ընդգծեց նախարարը։