Նարեկ Բաբայանը փորձում է «մեջքից հարվածել» Մելիքսեթ Պողոսյանին

Վերլուծական 24 Դեկտեմբեր, 2021 21:17

Վերջին շրջանում մամուլն ակտիվորեն գրում է, որ Նիկոլ Փաշինյանը վերջնականապես որոշել է փոխել Սյունիքի մարզպետին: Այն, որ Մելիքսեթ Պողոսյանի գլխին մութ ամպեր էին կուտակվում, պարզ էր ՏԻՄ ընտրությունների ավարտից հետո, որոնց արդյունքները Նիկոլ Փաշինյանի և ՔՊ-ի համար, մեղմ ասած, գոհունակություն չեն առաջացրել:

Դրանից առաջ էլ Մելիքսեթ Պողոսյանի որդին էր հայտնվել քրեական պատմության կիզակետում` ՔՊ-ական իշխանությանը կրկին դարձնելով քննադատության թիրախ: Այնուհետև ՏԻՄ ընտրությունների ընթացքում Պողոսյանին չհաջողվեց ի մի բերել ռեսուրսները և հասնել այստեղ ՔՊ-ականների հաղթանակին: Կրկին ձախողումներ արձանագրվեցին Կապանում և Գորիսում, Մեղրիում էլ հաղթեց «Հանրապետություն» կուսակցությունը:

Օրեր առաջ Նիկոլ Փաշինյանը Մելիքսեթ Պողոսյանին երկարատև արձակուրդի էր ուղարկել, որից, կարծես թե, փորձում է օգտվել փոխմարզպետ Նարեկ Բաբայանը: Դեռ հեղափոխությունից անմիջապես հետո խոսվում էր այն մասին, որ Բաբայանն է լինելու Սյունիքի մարզպետը, սակայն, Կապանում կրած ծանր պարտությունից հետո Փաշինյանը նրան շնորհեց ընդամենը պատգամավորի մանդատ: Այնուհետ տարբեր առիթներով մամուլը գրում էր, որ Բաբայանը ամբիցիաներից չի հրաժարվել, պարզապես սպասում է հարմար պահի: Պահն էլ, կարծես թե, հասունացել է, այժմ Բաբայանը ակտիվ հանդիպումների մեջ է, փորձում է ցույց տալ, որ մարզում ավելի ընդունելի դեմք է քան Մելիքսեթ Պողոսյանը և դրանով համոզել Փաշինյանին՝ իրեն տալ մարզպետի պաշտոնը:

Սակայն, իհարկե, հարց է՝ Փաշինյանը մեկ թույլ թեկնածուին կփոխարինի՞ մյուս թույլ թեկնածույով: Ի վերջո, դժգոհությունը Պողոսյանից հենց վերջինիս թուլության մեջ էր, Փաշինյանին Սյունիքում հարցեր լուծող մարզպետ է պետք, իսկ ո՛չ Պողոսյանը, ո՛չ Բաբայանը հարցեր լուծող պաշտոնյայի, մեղմ ասած, չեն ձգում...