Սյունիքի մարզպետի դիպլոմը և՞ս կեղծ է․ Մելիքսեթ Պողոսյանը փորձում է հերքել փաստերը

Այսօր մամուլում  տեղեկություն տարածվեց, որ Սյունիքի մարզպետ Մելիքսեթ Պողոսյանը բարձրագույն կրթություն չունի և կեղծ դիպլոմով է դարձել մարզպետ։ ԼՈՒՐԵՐ․com-ի հետ զրույցում Սյունիքի մարզպետ Մելիքսեթ Պողոսյանն ասաց՝ եթե բարձրագույն կրթություն չունենար՝ ինչպե՞ս կարող էր այդ պաշտոնին անցնել ու մարզպետի պարտականությունները կատարել։ Ասացինք, որ մեզ հենց դա էլ հետաքրքրում է, քանի որ հանրային ծառայության մասին ՀՀ օրենքի 6-րդ հոդվածում հստակ պահանջ կա, որ մարզպետ կարող է նշանակվել բարձրագույն կրթություն ունեցող անձը՝ ի պատասխան մարզպետն ասաց, թե Սյունիքի մարզպետարանի կայքում այդ մասին նշված է։ Դիտարկմանը, թե այնտեղ նայել ենք, սակայն չի եղել՝ Պողոսյանը շրջանցեց հարցը․ «30 տարի հրամանատար եմ եղել, 3 պատերազմի եմ մասնակցել ու ոչ ոք չի ասել՝ բարձրագույն կրթություն ունե՞ք, թե՞ ոչ, որ հազարավոր մարդկանց եմ տարել կռվի դաշտ, փառքով, պատվով բերել եմ, ամենադժվար տեղերը կռվել ենք, էդ ժամանակ չեն ասել, հիմա՞ են ասում։ Ես ավարտել եմ, հարցը դա չէ, Գորիսի «Սյունիք» 98 պետական համալսարանի իրավաբանական բաժինն եմ ավարտել 1992-1996 թթ․»,- նշեց նա։ 

Ավելի ուշ նկատեցինք, որ մարզպետարանի կայքում մարզպետի կենսագրականում ավելացվել է, որ վերջինս 1992 թվականին ընդունվել և 1996 թվականին ավարտել է Գորիսի «Սյունիք» ինստիտուտը՝ իրավագիտություն մասնագիտությամբ։

Սակայն ուշագրավն այն է, որ Yerevan.Today կայքը հետաքննությամբ պարզել է, որ Մելիքսեթ Պողոսյանը դիպլոմ կեղծելով է բարձր պաշտոնի հասել։ Բանն այն է, որ կայքը հարցում է ուղարկել ԿԳՄՍ նախարարություն՝ պարզելու՝ Հայաստանում լիցենզիա ունեցե՞լ է Գորիսի «Սյունիք» ինստիտուտը, գործունեության ժամանակ, ըստ տարիների, ի՞նչ մասնագիտացումների համար է լիցենզիա ունեցել, ե՞րբ է բացվել և ե՞րբ է փակվել և ինչ պատճառով է փակվել, արդյո՞ք այդ բուհի տված դիպլոմը համարվում է պետական նմուշի փաստաթուղթ և ստացած կրթությունը՝ բարձրագույն կրթություն և՝ արդյո՞ք հավատարմագրված եղել է, թե՞ ոչ՝ այդ տարիներին գործող օրենսդրության համաձայն։ Հետաքրքրական է հարցման պատասխանը՝ «Սյունիք» ինստիտուտ արտադրական կոոպերատիվը (Ա/Կ) 1996 թվականի հուլիսի 22-ին բարձրագույն մասնագիտական կրթական ծրագրով «Ժուռնալիստիկա», «Ֆինանսներ և վարկ» և «Հաշվապահական հաշվառում և աուդիտ» մասնագիտությունների գծով ստացել է արտոնագիր՝ N 61, 1997 թվականի հուլիսի 16-ին՝ «Իրավագիտություն» մասնագիտության գծով արտոնագիր՝ N 98։ 

Ստացվում է՝ Սյունիքի մարզպետը 1992 թվականին ընդունվել, 1996 թվականին ավարտել է Գորիսի «Սյունիք» ինստիտուտը՝ իրավագիտություն մասնագիտությամբ, սակայն, այդ ինստիտուտը իրավագետ կրթելու արտոնագիր ստացել է մարզպետի ավարտելուց մեկ տարի անց միայն։ Ի դեպ, եթե անգամ փաստաթուղթը կեղծ չլիներ, միևնույն է, չէր կարող համարվել բարձրագույն կրթության պատշաճ վկայական, քանի որ բուհն այդ տարիներին հավատարմագրում չի ունեցել, իսկ Հայաստանի պետական հաստատություններում անցողիկ է համարվում այն դիպլոմը, որը տրվել է հավատարմագրված ԲՈւՀ-ի կողմից։

Այս թեմայով Ռուս խաղաղապահներին դուրս բերելու որոշումը կայացրել է Ռուսաստանի և Ադրբեջանի բարձրագույն ղեկավարությունը. Հաջիև Պապիկյանը հետևել է ԶՈՒ բարձրագույն և ավագ սպայական կազմերի ատեստավորման գործընթացի կրակային պատրաստության քննությանը «Հրապարակ». ՔՊ-ականները հիշել են Սյունիքի տեղը Սյունիքի մարզում ժայռային հատվածներով անցնող ճանապարհներին քարաթափումներ են լինում ՅՈՒՆԵՍԿՕ-ի «Կանանց և աղջիկների կրթություն» մրցանակին դիմելու հնարավորություն Ադրբեջանական ԶՈՒ–ն գիշերը կրակ է բացել Սյունիքի մարզի ուղղությամբ Արտակարգ դեպք. Սյունիքի մարզում էլեկտրաենթակայան է այրվում Գագիկ Խաչատրյանի գործով դատավորը Սյունիքի դատարանում նշանակվելուց հետո հետ է գործուղվել Երևան. ի՞նչ են պարզաբանում ԲԴԽ-ից. «Փաստ» Դավիթ Օհանյանը նշանակվել է Սյունիքի առաջին ատյանի ընդհանուր իրավասության դատարանի դատավոր Մեկնարկել է բարձրագույն կրթություն չունեցող մասնագետների արտահերթ կամավոր ատեստավորումը