Կալիֆորնիայի Իրվայնի քաղաքապետը ծիծաղելով իր ուրախությունն է հայտնել հայերի «անհետացման» կապակցությամբ

Կալիֆորնիայի հայ համայնքը Իրվայնի քաղաքապետից պահանջել է ներողություն խնդրել Հայոց ցեղասպանության համատեքստում ծաղրի համար:

Ամերիկայի Հայ դատի հանձնախումբը դատապարտել է ամերիկյան Իրվայն քաղաքի քաղաքապետ Ֆարրահ Խանի պահվածքը Լոս Անջելեսում Թուրքիայի գլխավոր հյուպատոս Ջան Օղուզի հետ 2020 թվականի նոյեմբերին կայացած հանդիպմանը։

Մեկուկես տարի առաջ տեղի ունեցած հանդիպման մասին ANCA-ն իմացել է միայն հիմա։ Դրան մասնակցել է նաև «պատմաբան» Էրգուն Կիրլիկովալին։ Հանդիպման ընթացքում Խանը թուրք «պատմաբանի» հետ ծիծաղելով իր ուրախությունն է հայտնում հայերի «անհետացման» կապակցությամբ։ Նշենք, որ Կիրլիկովալին համարվում է ԱՄՆ-ում Հայոց ցեղասպանության ժխտման ջատագովներից մեկը։ Բացի այդ, Խանը Կիրլիկովալիին նշանակել է Իրվայնի քաղաքային խորհրդի անդամ։

Այս հանդիպման տեսագրությունները հրապարակվել են բացառապես թուրքալեզու կայքերում, հակառակ դեպքում հարցը կբարձրացվեր ANCA-ի կողմից 2021 թվականի նոյեմբերի 8-ին քաղաքապետ Խանի հետ հանդիպման ժամանակ։

ANCA-ն նշում է, որ Իրվայն քաղաքը, Օրենջ շրջանի կառավարիչների խորհուրդը, Կալիֆորնիա նահանգը, Ներկայացուցիչների պալատը, Սենատը և նույնիսկ Միացյալ Նահանգների նախագահը ճանաչում են Օսմանյան Թուրքիայում Հայոց ցեղասպանությունը:

Օրենջ շրջանի հայ համայնքը համարում է այս տեսանյութը ոչ տեղին, իսկ դրա բովանդակությունը՝ վնասակար։ Հայերը դատապարտել են ցեղասպանությունը ժխտող կամ ժխտողներին համակրող անձի նշանակումը պետական ​​պաշտոնում։ Հայ համայնքը քաղաքապետ Խանին խնդրել է ներողություն խնդրել իր պահվածքի համար։