‹‹Ցույց տվեք մեկին, ով նման դեպքում ասել է՝ ես մեղավոր եմ, գնում եմ››. Թևան Պողոսյանը՝ Ջհանգիրյանի մասին

ԲԴԽ նախագահի ժամանակավոր պատոնակատար Գագիկ Ջհանգիրյանը երեկ փորձեց բացատրություններ տալ  իր և  Բարձրագույն դատական խորհրդի նախկին  նախագահ Ռուբեն  Վարդազարյանի  զրույցի հրապարակված ձայնագրության  վերաբերյալ: Ձայնագրության մեջ հնչեցված մտքերի և Ջհանգիրյանի մեկնաբանությունների մասին ԼՈՒՐԵՐ.com-ը զրուցեց քաղաքագետ Թևան Պողոսյանի հետ:

‹‹Ցանկացած պետության և պետականության համար խնդիրները պետք է լուծվեն պետական գրասենյակներում, քննարկումները կայանան  օրենքների շրջանակներում, բայց, ցավոք, սկսած 1991թ.՝ մեր քաղաքական մշակույթը որևէ կերպ չի փոխվել: Մենք հազարավոր գաղտնազերծված ձայնագրություններ ենք լսել և որևէ քաղաքական հետևանքներ չենք  տեսել: 

Այն օրը, երբ ես մամուլում կկարդամ, որ այս մարդը հրաժարական է  տվել  և ասել է,  որ ինքը անմեղ է, բայց որոշել է   դատական համակարգում պաշտպանել իր անունը և  անմեղությունը, այդ օրը ես կմտածեմ, որ ունենք առաջնորդության ինչ-որ դեպք, որը պայքար է հանուն արդարության››,-ասաց Պողոսյանը:

Նա նշեց նաև, որ Գ. Ջհանգիրյանը նշել էր, որ մեկնաբանություն չի տալու  այդ ձայնագրության վերաբերյալ, ու զարմանալի է, թե ինչու հետո սկսեց մեկնաբանել:

‹‹Բնական է, որ պետք է ասեր, որ ինքը անմեղ է: Ցույց տվեք մեկին, ով նման դեպքում ասել է՝ ես մեղավոր եմ, գնում եմ: Ամբողջ խնդիրն այն է, որ պետականության հանդեպ կարևոր որոշում կայացնելիս չեն  օգտագործել  օրենքով սահմանված կարգերը. գնացել են ուժային բանկցությունների››,-եզրափակեց քաղաքագետը:

Սուսաննա Թամազյան