Այս հրեշավոր ծրագրի իրագործման դեպքում մենք վերջնականապես կորցնում ենք Սփյուռքը․ Սրապիոնյանը՝ ԱԱԾ նախագծի մասին
ՏեսանյութերՍփյուռքի նախկին փոխնախարար Սերժ Սրապիոնյանի համոզմամբ, ԱԱԾ–ն, որն առաջարկում է խստացնել սփյուռքահայերի համար Հայաստանի քաղաքացիություն ստանալու կարգը, ավելորդ խոչընդոտներ է ստեղծում սփյուռքահայերի համար։
«ԱԱԾ–ն, ըստ էության, խորացնում է այն՝ ինչ երազում էր Ալիևը։ Մինչև պատերազմը Ալիևը ուղղակի հայտարարեց, որ իր նավթադոլարները չունեն այն ուժը, որն ունի հայկական Սփյուռքը։ Եվ Ալիևը սարսափում էր Սփյուռքի գոյությունից՝ մեր անպարտելիության խորհրդանիշը համարելով Սփյուռքը։ Հիմա ԱԱԾ–ն քայքայում է այդ կառույցը նախ իր հանձնակատարով, երկրորդ՝ իր նախագծով, որի իրավական հիմքերը ես չեմ տեսնում։ Նույնիսկ համոզված եմ, որ այս հրահանգը եկել է դրսից, մեր թշնամական երկրներից և այդ հրահանգը իջեցվել է ԱԱԾ–ին, որպեսզի ԱԱԾ–ն առաջարկի այդպիսի օրենք, որպեսզի մարդիկ մտածեն, որ եթե ԱԱԾ–ն է, ապա ինչ–որ լուրջ բան կա»,– ասաց նա։
«ԱԱԾ–ն գործում է իբրև թշնամական երկրի անվտանգության ծառայություն ․․․ ԱԱԾ–ն, ըստ էության կատարում է քաղաքական պատվեր և այդ քաղաքական պատվերը Հայաստանի և Սփյուռքի միջև այլևս անվերահսկելի սեպ խրելն է»,– ասաց նա՝ հավելելով, որ վարչապետ Նիկոլ Փաշինյանը, որը փորձում է կարգավորել Ադրբեջանի և Թուրքիայի հետ հարաբերությունները, հանկարծ հասկացավ, որ այս հարցում Սփյուռքը խանգարում է իրեն և գնաց այն ճանապարհով, որ իրեն մատնացույց են անում Հայաստանի թշնամիները։
«Դուք կարծում եք, որ ՀՀ ԱԱԾ–ն առանց վարչապետի գիտության կարող էր օրենքի նախագի՞ծ դնել քննարկման։ Ես գոնե այդպես չեմ կարծում։ Ես կարծում եմ, որ դա ամենավերևներում մշակված դիվային ծրագիր է, և այս հրեշավոր ծրագրի իրագործման դեպքում մենք վերջնականապես կորցնում ենք Սփյուռքը, որովհետև առանց այդ էլ բնակության երկրի օրենքները, դրանց պարտադրանքները հային հայ պահելու գրեթե նվազագույն պայմաններն էլ են վերացրել։ Սփյուռքում հայերը հայ են մնում առավելապես իրենց ջանքերի և ներդրած միջոցների հաշվին։ Իսկ եթե մենք էլ ենք օգնում բնակության երկրին, հայերը կարճ ժամանակում կարող են ուծացվել»,– ասաց նա։