«Արմեն Գրիգորյանի հայտարարությունը չի համապատասխանում իրականությանը»
Արցախ«Արմեն Գրիգորյանի այն հայտարարությունը, թե իբր Հայաստանի ստորաբաժանումները հանում են Արցախից, չի համապատասխանում իրականությանը, պարզապես հիմա Հայաստանից զորակոչված ժամկետայինների վերջին խումբն է զորացրվում, իսկ ՀՀ զինված ուժերը արդեն 1.5 տարի է, Արցախում չեն: Իսկ զորակոչի վերաբերյալ որոշումը կայացվել է ոչ թե հիմա, այլ պատերազմի ավարտից անմիջապես հետո»,-Ազգային անվտանգության խորհրդի քարտուղար Արմեն Գրիգորյանի արած հայտարարությանը ԼՈՒՐԵՐ.com-ի հետ զրույցում անդրադարձավ քաղաքագետ Տիգրան Գրիգորյանը:
Նրա խոսքով՝ Պաշտպանության բանակը շարունակելու է գոյություն ունենալ՝ պայմանագրային հիմունքներով և նաև զորակոչ է լինելու Արցախում:
«Ռուսական խաղաղապահ առաքելությունը ի վիճակի չէ միայնակ ապահովել Արցախի անվտանգությունը թեկուզ թվաքանակի առումով, այդ հարցում կարևոր դերակատարում ունի Պաշտպանության բանակը: Ռուս խաղապահները կատարում են ավելի շատ զսպող դեր: Կարծում եմ՝ եթե Հայաստանի իշխանությունները չշարունակեն ոչ կոռեկտ հայտարարություններ անել այս թեմայով և հավելյալ խնդիրներ չստեղծեն, անվտանգային առումով ինչ-որ նորություններ չեն լինելու Արցախում»,-նշեց Գրիգորյանը: