Նազելի Բաղդասարյանն ընդդե՞մ ՔՊ-ի. Շիրակում իշխանության համար պայքարը թեժանում է
Analytical
Շիրակի մարզպետ Նազելի Բաղդասարյանը չի ցանկանում կիսել իշխանությունը և լծակները անգամ սեփական թիմակիցների հետ: ՔՊ վարչությունն ու խորհուրդը գրավելու, հնարավորինս շատ յուրայիններ խցկելու Սուրեն Պապիկյանի մոլուցքը սկսել է նյարդայնացնել Բաղդասարյանին։ Պարզվում է՝ Արթիկում եւս Պապիկյանը ցանկացել է իր թեկնածու Արթուր Ափրիկյանին դարձնել խորհրդի նախագահ: Ափրիկյանը մարզպետարանի աշխատակից է, փոխմարզպետի խորհրդականը եւ Պապիկյանի կուրսեցին, սակայն լրատվամիջոցները նշում են որ մարզպետ Նազելի Բաղդասարյանը հատուկ հրահանգել է փակել Ափրիկյանի «օդերը»: Մարզպետը, ըստ շիրակցիների, կատաղի պայքար է մղում Պապիկյանի կադրերի դեմ: Արդյունքում` Ափրիկյանը, ով ՏԻՄ ընտրություններում ՔՊ շտաբի տեղի պատասխանատուն է եղել, զրո ձայն է ստացել:
Սակայն, Բաղդասարյանի կատաղի պայքարը չի սահմանափակվում միայն Սուրեն Պապիկյանի ամբիցիաները սահմանափակելով: Դիցուք ՝ Բաղդասարյանը դեմ է եղել, որպեսզի իր թիմակից ՔՊ-ականները ավելացնեն զբաղեցրած պաշտոնների թիվը Գյումրիի քաղաքապետարանում: Սակայն հարց է առաջանում, թե ինչու պետք է առաջին հայացքից կարկառուն ՔՊ-ական երևացող Բաղդասարյանը նման քայլի գնար: Ըստ երևույթին՝ մարզպետը չի ցանկանում, որ այդ բաղձալի պաշտոնը զբաղեցնի ոչ յուրային ՔՊ-ականը, քանի որ մամուլը բազմիցս էր անդրադարձել Գյումրիի քաղաքապետարանում Բաղդասարյանի կադրային նախապատվություններին:
Ամիսներ առաջ մամուլը գրել էր, որ Կարեն Սարուխանյան-Նազելի Բաղդասարյան տանդեմը փորում է այն ժամանակվա գործող մարզպետի ոտքի տակ: Դրան հաջորդեց հրապարակումը, որ Գյումրիում կայացած ընտրություններից հետո ՔՊ շտաբում թեժ է եղել, իսկ հիմնական կռվարարներն էին՝ Սարուխանյանը, Հարությունյանը և Բաղդասարյանը: Ուշագրավն այն է, որ ընտրություններից առաջ ձևավորված «Քաղաքացիական պայմանագիր» կուսակցության՝ Գյումրու տարածքային խորհրդի կազմից արդեն ակնհայտ էր ներթիմային բախումը: Գյումրու տարածքային խորհուրդը բաղկացած է 9 անդամից: Նախագահը իշխող թիմի՝ Շիրակի մարզի կադրային հարցերի կնքահայրն է՝ այժմ արդեն պատգամավոր Կարեն Սարուխանյանը, քարտուղարը՝ Ազգային ժողովի ՔՊ-ական պատգամավոր Էմմա Պալյանը, ով նախորդ խորհրդարանում, երբ Կարեն Սարուխանյանը պատգամավոր էր, նրա օգնականն էր, այն օգնականը, ով, օրինակ, սեփական կրեատիվ մտքերի բացակայությունը լրացնում էր, ասենք, Արմեն Աշոտյանի տեքստերը copy-paste անելով ու իր ղեկավարի էջում տեղադրելով: Հետաքրքիր է, որ ՔՊ-ի Գյումրու տարածքային խորհրդի ընտրություններին մասնակցել է նաև Շիրակի այն ժամանակվա մարզպետ Հովհաննես Հարությունյանը: Վերջինս, սակայն, չի ընտրվել խորհրդի նախագահ, ավելին, ըստ մամուլի տեղեկությունների, ստացել է մեկ ձայն՝ հավանաբար հենց իր ձայնը։ Խորհրդի կազմը, ըստ էության, համալրված է բացառապես Կարեն Սարուխանյանի մտերիմներով: Ճիշտ է` Սարուխանյանը զիջեց դիրքերը հարազատ Ամասիայում ՔՊ-ի պարտությունից հետո, զրկվեց փոխնախարարի պաշտոնից, սակայն մարզում դեռևս չի հանձնվել: Եվ ակնհայտ է, որ Նազելի Բաղդասարյանի կողմից տարվող կադրային քաղաքականությունը նպատակ է հետապնդում նվազեցնել մարզում Սարուխանյանի ազդեցության լծակները: Դիրքային պայքարում չի նահանջում նաև պաշտոնից ազատված Հովհաննես Հարությունյանը։ Ինչպես գիտենք, Գյումրիում քաղաքապետի տեղակալի պաշտոնին հավակնում էր ՔՊ-ի ցուցակի երրորդ համարը՝ Գյումրու «Ինֆեկցիոն» հիվանդանոցի տնօրեն Աստղիկ Բեյբությանը։ Այս հարցում շահագրգիռ էր անձամբ Հարությունյանը, սակայն, ինչպես գիտենք, հաջողության չհասավ, կրկին Նազելի Բաղդասարյանի համառ ջանքերի արդյունքում:
Most Popular 
EU ambassador visits Armenia nuclear plant
