Վերջին զարգացումները ցույց տվեցին, որ անօգտակար էր Լևոն Տեր-Պետրոսյանի ներգրավվումը կարևոր հարցերի քննարկմանը․ Էդգար Ղազարյան
ՔաղաքականՄինչ Հայաստանում, Արցախում և, ինչու չէ, սփյուռքում, աղոտ հույսեր էին արթնացել Ամենայն Հայոց Կաթողիկոս Գարեգին Բ-ի և Հայաստանի ու Արցախի նախկին ու ներկա նախագահների հետ հանդիպումների առնչությամբ, ՀՀ առաջին նախագահ Լևոն Տեր-Պետրոսյանը երեկ հայտարարեց, որ այդ ձևաչափով քննարկումների անհրաժեշտությունն, ըստ էության, սպառված է։ Երկխոսության գործընթացն արդեն իսկ վիժեցվել էր Քոչարյանի ասուլիսի և Փաշինյանի հարցազրույցի հետևանքով։ Դրանց արդյունքը, փաստորեն, հետևյալն է. Քոչարյանի նպատակն ամեն գնով Փաշինյանի իշխանության տապալումն է, իսկ Փաշինյանի նպատակը՝ ամեն գնով իր իշխանության պահպանումը, ընդգծել է Լևոն Տեր-Պետրոսյանը։
Ի՞նչ մեսիջներ է ուղարկում ԼՏՊ-ն և ինչ ակնկալել համազգային քննարկումների հիշյալ ձևաչափից։
«Վերջին զարգացումները ցույց տվեցին, որ անօգտակար էր և, նույնիսկ վտանգավոր, Լևոն Տեր-Պետրոսյանի ներգրավվումը նման կարևոր հարցերի քննարկմանը։ Կարճ ժամանակահատվածում նա ապացուցեց իր ապակառուցողական դերակատարությունն ու խիստ վտանգավոր գործելաոճը, որը, ըստ էության, սպասարկում է Նիկոլ Փաշինյանի (իր բնորոշմամբ՝ ազգակործան պատուհասի) օրակարգը։ Նախ` երեք նախկին նախագահների շարքում նա առանձնանում է միայն դրանով, որ ձախողել է այդ պաշտոնում, կարճ ժամանակահատվածում մսխել է իր հանդեպ եղած երբեմնի հանրային վստահությունն ու աջակցությունը և, Արցախի հարցում իր անընդունելի դիրքորոշումների համար ստիպված է եղել հրաժարական տալ՝ թիկունքում ունենալով 1996 թվականի՝ թերևս ամենախայտառակ ընտրությունների արդյունքները»,-նշեց Լեհաստանում ՀՀ նախկին դեսպան Էդգար Ղազարյանը։
ԼՈՒՐԵՐ․ com-ի զրուցակցի պնդմամբ, Արցախի հարցը լուծված համարելու Իլհամ Ալիևի թեզերը պաշտպանելը, Հայաստանի համար կապիտուլյացիայի տարբերակների միջև ընտրություններ կատարելու պատրաստակամությունը, Նիկոլ Փաշինյանի ձախողումներին և ազգակործան գործունեությանը այլոց մասնակից դարձնելու ձգտումները և այլն, ոչ մի պարագայում չեն կարող ընդունելի լինել, առավել ևս մի գործչի, ով սեփական նախաձեռնությամբ երբեք աչքի չի ընկել ժամանակին իր մոտեցումները հրապարակայնորեն ներկայացնելու պատրաստակամությամբ։
«Ես կարծում եմ, որ նրան այլևս չպետք է ուշադրության արժանացնել և պետք է թողնել իր համար նախընտրելի՝ լուսանցքային կարգավիճակում։ Հայաստանի և Արցախի նախկին նախագահների ջանքերի մեկտեղման Վեհափառի ստեղծած ձևաչափը պաշտոնական որևէ ձևակերպում չունի։ Այն ցանկացած պահի կարող է փոփոխվել՝ ոչ միայն որոշներին շարքերից հեռացնելու, այլև այլ պատասխանատու դերակատարություն ունեցող նոր մարդկանց ներգրավվելու միջոցով»,-նշեց քաղաքական գործիչը։
«Համազգային քննարկման առարկա չեն կարող դառնալ կապիտուլյանտի ապազգային գործունեության հետևանքների պատասխանատվությանը այլոց մասնակից դարձնելը, այլ պետք է լինեն համազգային ջանքերը՝ ուղղված առաջին հերթին այդ կապիտուլյանտից ազատվելուն, նրան պատասխանատվության ենթարկելուն և ստեղծված իրավիճակում պատասխանատու որոշումների կայացմանը»,-համոզմունք հայտնեց Ղազարյանը։
Արա Ալոյան