Գերասիմ Վարդանյանի կալանավորման ժամկետը երկարացվեց երեք ամսով. «Փաստինֆո»

ՀՅԴ անդամ Գերասիմ Վարդանյանի խափանման միջոցը փոխելու հարցում դատարանն անդրդվելի էր. եւս երեք ամիս նա կմնա կալանքի տակ ։

«Փաստինֆո»-ի թղթկացի հաղորդմամբ՝ Երևանի ընդհանուր իրավասության դատարանում՝ դատավոր Կարեն Ֆարխոյանի նախագահությամբ, ընթանում է ՀՅԴ անդամներ Գերասիմ Վարդանյանի, Բագրատ Եսայանի, Գառնիկ Մելքումյանի գործով դատական նիստը, որի ընթացքում Գերասիմ Վարդանյանի պաշտպան Բենիկ Գալստյանը միջնորդություն ներկայացրեց՝ պահանջելով Վարդանյանի նկատմամբ ընտրված խափանման միջոց կալանավորումը փոխարինել երաշխավորությամբ։ Գերասիմ Վարդանյանի համար անձնական երաշխավորություն են ներկայացրել ԱԺ 14 պատգամավոր՝ Արամ Վարդևանյանը, Արծվիկ Մինասյանը, Աննա Գրիգորյանը, Սեյրան Օհանյանը, Գեղամ Մանուկյանը և ընդդիմադիր այլ պատգամավորներ։ Անձնական երաշխավորության միջնորդությունից զատ պաշտպանը միջնորդեց նաև որպես այլընտրանքային խափանման միջոց կիրառել գրավը, եթե, այդուհանդերձ, դատարանը գտնի, որ երաշխավորությունը բավարար չէ Վարդանյանի պատշաճ վարքագիծն ապահովելու համար։ Ինքը՝ Գերասիմ Վարդանյանը, նշեց, որ ինքն այն մարդը չէ, որ գա դատարան՝ ազատություն խնդրելու, այն, ինչ կատարվում է՝ հայրենիքը պահպանելու պայքար է, ինքը գիտակցված է մտել պայքարի մեջ և որոշումը թողնում է դատավորին, նրա խղճին։

ԱԺ «Հայաստան» խմբակցության պատգամավոր Արամ Վարդևանյանը, որը դատարանում էր և պատրաստակամություն էր հայտնել երաշխավորելու Գերասիմ Վարդանյանի համար, հայտարարությամբ հանդես եկավ՝ արձանագրելով, որ Վարդանյանի կալանավորման որևէ հիմք առկա չէ։ Ի դեպ, դատարանը, Վարդանյանին կալանավորելու որոշում կայացնելով, հավանական էր համարել նոր հանցանք կատարելու հավանականությանը, ինչին արձագանքելով Արամ Վարդևանյանը արձագանքեց՝ այդ կանխատեսական բնույթի ռիսկին կարողանում ենք հակադրել իրական կյանքը, որևէ մեկը միամտություն չունի, որ նոր հանցանք կատարելու հակում ունեցող անձի մոտ ՔԿՀ-ում նման ռիսկերը վերանում են, հակառակը, մինչդեռ, Վարդանյանի պարագայում կարող ենք խոսել առհասարակ խափանման միջոց վերացնելու մասին։ Երաշխավորներից Արծվիկ Մինասյանը ուշադրություն դարձրեց Վարդանյանի անցած ուղու վրա։ Մինասյանն ընդգծեց՝ Վարդանյանը 44-օրյա պատերազմի առաջին օրվանից առաջնագծում էր, երբ երկրի ներսում անարդարությունը մոլեգնում էր, Վարդանյանը դրա դեմ պայքարի առաջնագծում էր, բացի այդ, Վարդանյանն ԱԺ պատգամավորի օգնական է, նրան ապօրինի կալանքի տակ պահելով, խոչընդոտում ենք նաև ԱԺ պատգամավորի գործունեությանը։

Լսելով կողմերի դիրքորոշումը՝ դատավոր Կարեն Ֆարխոյանը մերժեց Վարդանյանի նկատմամբ անձնական երաշխավորություն և գրավ կիրառելու միջնորդությունները՝ նշելով, որ այլընտրանքային խափանման միջոցները ի զորու չեն ապահովելու Վարդանյանի պատշաճ վարքագիծը։ Գերասիմ Վարդանյանի կալանավորման ժամկետը երկարացվեց ևս երեք ամսով։ Դատական նիստերի դահլիճում որոշման հրապարակումից հետո իրավիճակը փոքր ինչ լարվեց, հավաքվածները վանկարկեցին՝ «ամոթ»։

Հիշեցնենք, որ քրեական գործը վերաբերում է 2020թ նոյեմբերի 9-ին կապիտուլյացիոն ակտի ստորագրմանը հաջորդած ակցիաներին, մասնավորապես՝ «Ազատություն» ՌԿ շենք մուտք գործելու դրվագին։ Գերասիմ Վարդանյանը, Բագրատ Եսայանը, Գառնիկ Մելքումյանը մեղադրվում են 2020 թվականի նոյեմբերի 10-ին Երևան քաղաքում տեղի ունեցած զանգվածային անկարգությունների ժամանակ խոչընդոտները վերացնելու եղանակով զանգվածային անկարգություններին օժանդակելու, ինչպես նաև խմբի կազմում լրագրողի մասնագիտական օրինական գործունեությանը խոչընդոտելու մեջ: Քրեական գործով կալանավորված է միայն Գերասիմ Վարդանյանը, ընդ որում, նրան կալանավորելու առաջին փորձը եղել է դեռևս 2020թ, սակայն դատարանները մերժել են կալանքի միջնորդությունները՝ հիմնավոր կասկածի բացակայության հիմքով։ Քրեական գործի մասին ԱԱԾ-ն երկու տարի անց է հիշել, քննիչը փոխել է Վարդանյանի մեղադրանքը և կրկին կալանավորելու միջնորդություն ներկայացրել դատարան, ինչը նույնպես մերժվել էր։ Քննիչը նրա նկատմամբ 60 մլն գրավ կիրառելու որոշում էր կայացրել, ինչը Գերասիմ Վարդարյանը մուծել չէր կարողացել, ինչից հետո միայն նա կալանավորվել է նախ մեկ ամսով, ապա շարունակաբար երկարացվել է կալանավորման ժամկետը։ Նա կալանքի տակ է գտնվում 2022 թվականի մայիս ամսից։

Այս թեմայով «Ժողովուրդ». Քաղաքական հրահանգը իջեցվեց Շատ հնարավոր է, որ Փաշինյանը, ինչ-որ մեքենայի բեռնախցիկում տեղավորվելով որպես ուսապարկ, հեռացել է. Գերասիմ Վարդանյան