Գիտության մեջ սահմաններ չկան, որքան էլ ներդրում անես՝ քիչ է. Արա Աբրահամյան (լուսանկարներ)

Այսօր՝ նոյեմբերի 18-ին, Գիտությունների ազգային ակադեմիայում տեղի ունեցավ մրցանակաբաշխություն, որի ընթացքում ամփոփվեցին ՀՀ Գիտությունների ազգային ակադեմիայի, Ռուսաստանի հայերի միության և «Արարատյան ալյանս» մտքի կենտրոն ինստիտուտի հայտարարած երիտասարդ գիտնականների համար «Լավագույն գիտական աշխատանք» մրցույթի արդյունքները։ Մրցանակաբաշխությանը ներկա էր նաև Ռուսաստանի հայերի միության նախագահ, ՅՈՒՆԵՍԿՕ-ի բարի կամքի դեսպան և «Արարատյան Ալյանս» մտքի կենտրոն-ինստիտուտի հիմնադիր Արա Աբրահամյանը։

«Նախ կցանկանամ շնորհավորել հաղթող մասնակիցներին և ասեմ, որ Ռուսաստանի հայերի միությունը տասնյակ տարիներ եղել է ԳԱԱ կողքին և միշտ անցկացրել է մրցույթներ։ Ցավոք, վերջին երեք տարիների ընթացքում, պայմանավորված վերջին իրադարձություններով՝ կորոնավիրուսով և հետո պատերազմով, ստիպված պասիվացան մեր աշխատանքները, բայց հիմա պետք է լրացնենք այդ բացը և ամեն տարի կազմակերպենք նման միջոցառումներ և մրցանակաբաշխություններ։ Ես միշտ եղել եմ գիտության կողքին և հիմա էլ պատրաստ եմ նպաստել դրա զարգացմանը, քանի որ գիտությունը պետության ամենակարևոր օղակներից մեկն է։ Մենք՝ հայերս, շատ խելոք և խելացի ազգ ենք, և եթե մենք պայմաններ ստեղծենք՝ ամեն ինչ առաջ կգնա։ Գիտության համար, որքան էլ ներդրում անես, միևնույն է քիչ է, քանի որ գիտության մեջ սահմաններ չկա»,- այս մասին նշեց նա։

Ակադեմիկոս Արթուր Իշխանյանն էլ իր հերթին շնորհակալություն հայտնեց Արա Աբրահամյանին և նշեց, որ այսօրինակ մրցանակները մեր երկրում այս ծանր պայմաններում կարևոր, էական,  անգամ մշակութաստեղծ երևույթ են, որովհետև գիտության ոշորտն անշուշտ ունի սատարման անհրաժեշտություն։ «Պետք է գիտակցենք, որ այո, սա 21-րդ դարն է, որը տեխնոլոգիաների դարն է, ազգերի մրցակցությունը մտել է այդտեղ, ավելի ճիշտ առավել արտահայտվել է այս դարում, իսկ տեխնոլոգիաների հիմքում անշուշտ գիտությունն է և մեր երկրի ապագան ինչ-որ չափով մեր երիտասարդ գիտնականների ձեռքին է։ Պարոն Աբրահամյանի կողմից  կազմակերպած այս մրցանակաբաշխությունը, ըստ իս էական ներդրում է գիտության ոլորտում աշխուժացման համար և հրաշալի ստիմուլ է հանդիսանում ապագայում ևս լավ գործելու։ Եվ ես հույս եմ հայտնում փայփայում, որ մրցանակաբաշխությունը կլինի շարունակական»,- նշեց Իշխանյանը։ 

Մրցանակաբաշխության  անվանակարգերում հաղթող են ճանաչվել ՝

- Ֆիզիկա, մեխանիկա, մաթեմատիկա, ինֆորմատիկա անվանակարգում 1-ին տեղը զբաղեցրել է Դավիթ Հայրապետյանը (Հայ-Ռուսական համալսարան), 2-րդ տեղը՝ Արմեն Սարգսյանը (ՀՀ ԳԱԱ Ֆիզիկական հետազոտությունների ինստիտուտ), 3-րդ տեղը զբաղեցրել են Տիգրան Պետրոսյանը (Երևանի պետական համալսարան) և Վահրամ Ղազարյանը (ՀՀ ԳԱԱ Ֆիզիկայի կիրառական պրոբլեմների ինստիտուտ):

- Քիմիա և Երկրի մասին գիտություններ անվանակարգում 1-ին տեղը զբաղեցրել է Ջոն Կարապետյանը (ՀՀ ԳԱԱ Ա. Նազարովի անվան երկրաֆիզիկայի և ինժեներային սեյսմաբանության ինստիտուտ), 2-րդ տեղը՝ Մարիետա Զաքարյանը (ՀՀ ԳԱԱ Ա. Նալբանդյանի անվան քիմիական ֆիզիկայի ինստիտուտ), Աստղիկ Շահխաթունին (ՀՀ ԳԱԱ Օրգանական և դեղագործական քիմիայի գիտատեխնոլոգիական կենտրոն): 3-րդ տեղը զբաղեցրել են Բալաբեկ Սարգսյանը (Ա. Ալիխանյանի անվան ազգային գիտական լաբորատորիա) և Անուշ Հովակիմյանը (ՀՀ ԳԱԱ Օրգանական և դեղագործական քիմիայի գիտատեխնոլոգիական կենտրոն):

- Կյանքի մասին գիտություններ անվանակարգում 1-ին տեղը զբաղեցրել է Գոհար Ցականովան (ՀՀ ԳԱԱ Մոլեկուլային կենսաբանության ինստիտուտ), 2-րդ տեղը՝ Հեղինե Գևորգյանը (Երևանի պետական համալսարան), 3-րդը՝ Վարդան Ասատրյանը (ՀՀ ԳԱԱ Կենդանաբանության և հիդրոէկոլոգիայի գիտական կենտրոն):

- Հայագիտություն և հասարակական գիտություններ անվանակարգում 1-ին մրցանակին արժանացել են Լևոն Աղիկյանը (ՀՀ ԳԱԱ Հնագիտության և ազգագրության ինստիտուտ), Միքայել Մալխասյանը (Երևանի պետական համալսարան), Վոլոդյա Մկրտչյանը (Արցախի Մեսրոպ Մաշտոց համալսարան): 2-րդ մրցանակին արժանացել են Մարտին Հարությունյանը (ՀՀ ԳԱԱ Արվեստի ինստիտուտ), Մերի Սարգսյանը (ՀՀ ԳԱԱ Գիտակրթական միջազգային կենտրոն), Արմեն Ավանեսյանը (ՀՀ ԳԱԱ Մ. Աբեղյանի անվան գրականության ինստիտուտ): 3-րդ մրցանակին արժանացել են Գոռ Մարգարյանը (ՀՀ ԳԱԱ Արևելագիտության ինստիտուտ), Ռուբեն Մելքոնյանը և Նաիրա Պողոսյանը (Երևանի պետական համալսարան)։ 

 Մրցանակային ընդհանուր ֆոնդը կազմել է 15 միլիոն դրամ: