Վարչապետը սխալվում է՝ խաղադրույքների ոլորտում «շա՜տ լուրջ անկում» չկա. հակառակը՝ ծավալներն աճել են. civilnet

Վարչապետ Նիկոլ Փաշինյանը հունվարի 10-ին լրագրողների հետ հանդիպմանը հայտարարեց, թե իրենց իշխանության կողմից շահումով խաղերի ոլորտում կատարված օրենսդրական սահմանափակումների արդյունքում խաղադրույքների ոլորտում լուրջ անկում է գրանցվել։

Պնդումը վարչապետը հնչեցրել էր՝ հակադարձելով լրագրողի՝ խաղադրույքների ոլորտում գործունեություն ծավալող «Վիվառո» ընկերության սեփականատեր Վիգեն Բադալյանի և պաշտոնյաների միջև կապի, հովանավորչության վերաբերյալ հարցին։

«Ձեր կողմից հիշատակված ընտանիքը հենց այդ բիզնեսի [շահումով խաղերի – խմբ.] ամենախոշոր շահառուներից մեկն էր և հետևաբար, եթե լիներ հովանավորչություն…։ Ընդ որում, բացի այդ, հիմա խաղադրույք կատարելը էդքան հեշտ չի, ինչքան նախկինում։ Մենք այսօր տեսնում ենք, որ խաղադրույքների ոլորտում սենց շա՜տ լուրջ անկում կա»,- պնդել էր վարչապետ Փաշինյանը։

ՍիվիլՆեթի փաստերի ստուգման թիմը՝ #CivilNetCheck-ը, պարզել է, որ շահումով խաղերի ոլորտում, հակառակ վարչապետի պնդումներին, անկում չի գրանցվել։

2022-ի 11 ամիսներին կատարվել է ավելի քան 5,3 տրլն դրամի խաղադրույք

Պետեկամուտների կոմիտեն #CivilNetCheck-ի հարցմանն ի պատասխան հայտնել է, որ Հայաստանում՝ 2022-ի հունվար-նոյեմբերի տվյալներով, ինտերնետ շահումով խաղերում ավելի քան 5,3 տրլն դրամի խաղադրույք է կատարվել։ Սա 2021-ի ամբողջ տարում գրանցված 3,9 տրլն դրամից ավել է մոտ 36%-ով։

Այս թիվը ռեկորդային է Հայաստանի պատմության մեջ։ Կատարված խաղադրույքների ծավալը 2017-ին կազմել է 138,5 մլրդ դրամ, 2018-ին՝ 333,6 մլրդ դրամ, 2019-ին հատել է տրիլիոնի շեմը և կազմել է 1,1 տրլն դրամ, 2020-ին՝ մոտ 2 տրլն դրամ, 2021-ին՝ 3,9 տրլն դրամ։

Հատկանշական է, որ 2022-ի 11 ամիսներին գրանցված 5,3 տրլն-ի մեջ ներառված չեն դեկտեմբերի տվյալները, հետևապես՝ նաև Ֆուտբոլի աշխարհի առաջնության խաղերի մեծ մասի ժամանակ արված խաղադրույքների ծավալը, որոնք անցկացվել են նոյեմբերի 20-ից դեկտեմբերի 18-ը ներառյալ։ Այս թվում ներառված չեն նաև խաղատներում կատարված խաղադրույքները։

ՊԵԿ-ի տվյալների համաձայն՝ 2022-ի հունվար-նոյեմբերին խաղատներում կատարվել է 44,1 մլրդ դրամի խաղադրույք, այսինքն՝ համեմատելով ինտերնետ շահումով խաղերի 5,3 տրլն դրամի հետ՝ ստացվում է, որ ընդհանուր խաղադրույքների 99%-ը կատարվում է առցանց կազինոներում և սպորտային վիճակախաղերում։

Խաղադրույքների ծավալի աճը փաստում են նաև Վիճակագրական կոմիտեի հասանելի վերջին տվյալները, համաձայն որոնց՝ 2022-ի հունվար-սեպտեմբերին «շահումով խաղերի կազմակերպման հետ կապված գործունեություն» ոլորտի ծավալները նախորդող տարվա նույն ժամանակահատվածի համեմատ աճել են 5,5%-ով։ Մանրամասները՝ այստեղ։

Այս թեմայով Իրանն ու Ռուսաստանն անվտանգության ոլորտում փոխըմբռնման հուշագիր են ստորագրել Ալիևը լուրջ մարդ է, իր երկրի շահերն է առաջ տանում, նա Բաքվից կորոշի՝ հայը տաք ջուր ունենա, թե՞ ոչ Տնտեսական ակտիվության ցուցանիշը աճել է Վարչապետը պետք է հասկանա` հերիք եղավ, բոլ եղավ, ինչքա՞ն կտոր-կտոր տանք. գեներալ-լեյտենանտ (տեսանյութ) Անկում տարադրամի շուկայում․ փոխարժեքն՝ այսօր Նավթի գներն աճել են Նոյեմբերյանում ԵԿՄ ավտոմեքենան քշել է բնակիչների ուղղությամբ, երկու հոգի լուրջ վնասվածք է ստացել (տեսանյութ) Հայաստանի պաշտպանական ծախսերը նկատելիորեն աճել են. SIPRI «Ժողովուրդ». Ժողովրդավարությունը թիվ մեկ «բրենդ» հռչակած վարչապետը չի մեկնաբանել Սամվել Վարդանյանի հանդեպ կատարվածը Վարչապետը Հայաստանի իշխանության որդեգրած խաղաղության օրակարգի հարցում երկու շատ կարևոր իրադարձություն է նշում