Նիկոլ Փաշինյանն իրագործում է հայաթափման հերթական ծրագիրը

Аналитический 22 Февраль, 2024 22:45

Գեղարքունիքի մարզի բնակիչներն երեկ փակել էին Երևան-Մարտունի ճանապարհը. նրանք բողոքում են ՊԵԿ-ի հարկային վարչարարության դեմ, ըստ որի՝ արտագնա աշխատանքի մեկնողներն այլ պետություններում ստացված եկամուտից պետք է եկամտային հարկ վճարեն Հայաստանում։ Ավելի վաղ տեղեկություն էր տարածվել, ըստ որի՝ hազարավոր քաղաքացիներ, որոնք աշխատելու նպատակով Ռուսաստան են մեկնել, Հայաստան վերադարձից հետո նամակներ են ստացել ՊԵԿ-ից, որ 100.000 դրամից մինչև 1 միլիոն դրամ հարկային պարտավորություն ունեն և պետք է վճարեն։ Դա, բնականաբար, հունից հանել է՝ առանց այդ էլ մի կերպ ծայրը ծայրին հասցնող քաղաքացիներին և նրանք բողոքի ակցիա էին կազմակերպել՝ պահանջելով իրենց փայ խոստացված ապագան:

Առաջին հայացքից թվում է, որ խնդիրը զուտ տնտեսական է, սակայն վտանգները, որոնք սպառնում են նման որոշման հետևանքով, ավելի քան լուրջ են, եթե չասենք` շոշափում են ազգային անվտանգությանը վերաբերվող հարցեր։ Սա փաստացի ոչ այլ ինչ է, քան Փաշինյանի հերթական հայաթափման ծրագիրը, որը վերջինս փորձում է կյանքի կոչել։ Ակնհայտ է, որ այս իշխանություններn անում են ամեն բան` երկիրը դատարկելու, ժողովրդին արտագաղթի մղելու համար և նրանց մոտիվացիան հասկանալի է` առանց մարդկանց, ովքեր կառչած են սեփական հողից, այդ հողից հրաժարվելը, այն թշնամուն «նվիրելը» շատ ավելի հեշտ է։ Բացի այդ, ակնհայտ է, որ Փաշինյանին ձեռնտու է իր վարած քաղաքականությունը քննադատող և այն չկիսող ընտրազանգվածի հեռանալը, այդ դեպքում էլ շատ ավելի հեշտ կլինի պահպանել և երկարաձգել սեփական իշխանությունը։

Ի դեպ, ուշագրավ է, որ այս իշխանությունների վարած հայաթափման քաղաքականության հետևանքով Հայաստանից վերջին երեք տարում գնացել-չի եկել 138,024 մարդ։

Մասնավորապես՝

• 2023թ․ արտագաղթողների պաշտոնական թիվը կազմել է 36,512 մարդ,

• 2022թ․՝ 27,941 մարդ,

• 2021թ․՝ 73,571 մարդ։

Համաձայն 2022 թվականին անցկացված մարդահամարի՝ Հայաստանի մշտական բնակչությունը կազմում է 2 մլն 932 հազար 731 մարդ: Իսկ առկա բնակչության թիվը կազմում է 2 մլն 869 հազար 438 մարդ։

Ի համեմատ նախորդ՝ 2011թ․ մարդահամարի՝ պակասել է թե՛ մշտական, թե՛ առկա բնակչության թիվը։ Մշտական բնակչության թիվը նվազել է 86,123 մարդով։ Հիշեցնենք, որ Նիկոլ Փաշինյանը 2019թ․ օգոստոսի 5-ին Արցախի Հանրապետության մայրաքաղաք Ստեփանակերտում հանրահավաքի ժամանակ, ի թիվս միջին աշխատավարձը 7-ապատկելու, Հայաստանի ֆուտբոլի հավաքականը Եվրոպայի և/կամ աշխարհի առաջնության մեդալակիր դարձնելու և այլ խոստումների, խոստացավ նաև մինչև 2050 թվականը բնակչության թիվը հասցնել առնվազն 5 միլիոն մարդու։ Սակայն, ինչպես տեսնում ենք, երկիրը անվտանգային լրջագույն ճգնաժամի առջև կանգնեցրած, աշխարհաքաղաքական ուժերի բախման կենտրոն դարձրած Փաշինյանն անում է ամեն բան, որպեսզի հայաթափի Հայաստանը՝ այն ավելի խոցելի դարձնելով արտաքին ազդեցության համար։