Երբ քննադատում ես այն, ինչի առավել վատթար տարբերակը կյանքի ես կոչելու հետագայում

Վերլուծական 27 Փետրվար, 2024 21:40

Երեկ Երեւանի քաղաքապետ Տիգրան Ավինյանը հայտարարեց «Կոնդ» թաղամասի իրացման մեկնարկի մասին: Ասվեց, որ այս տարածքում հողի 1 քառակուսի մետրի կադաստրային արժեքը 214 եւ 139 հազար դրամ է, այսինքն` 500-600 դոլար, ինչին անմիջապես արձագանքեցին կոնդեցիները: ԶԼՄ-ին ուղղված նամակներում և զանգերում վերջիններս նշում էին, որ իրենց աբսուրդ գներ են առաջարկվում և իրենք պարզապես չգիտեն, թե 210 հազար դրամով Կենտրոնից ուր կարող են գնալ: Ստացվում է, որ Երևանի քաղաքապետարանը պատրաստվում է կոպեկների դիմաց կոնդեցիներին դուրս հանել սեփական տներից:

2019 թվականին ԱԺ-ում պատասխանելով պատգամավորների մտավախությանը, թե Ֆիրդուսի թաղամասի բնակիչները կարող են հայտնվել կառուցապատողների թակարդում և ստիպված լինեն էժան գներով օտարել իրենց տները, Նիկոլ Փաշինյանն ասել էր, որ նոր Հայաստանում Հյուսիսային պողոտայի պատմությունը չի կարող կրկնվել: «Այն, որ Հյուսիսային պողոտայի պատմություն չի կարող լինել նոր Հայաստանում, դա պարզ է: Այդ հարցերով զբաղվում է փոխվարչապետ Ավինյանը, որը հիմա այցով Վրաստանում է: Նամակը փոխանցեք, մենք համապատասխան ընթացք կտանք, բայց քաղաքացիների իրավունքները կպաշտպանվեն»,- ասել էր նա:

Իսկ այժմ բերենք հատված Նիկոլ Փաշինյանի ընտանեկան՝ «Հայկական ժամանակ» օրաթերթի՝ 2004 թվականի օգոստոսի 19-ի համարում զետեղված հոդվածից, որը վերնագրված էր՝ ««Նյու Վասյուկի». Հյուսիսային պողոտայի արձագանքները»: Հոդվածում մասնավորապես ասվում էր՝ «Հարյուրավոր մարդիկ, ում բնակարանները Հյուսիսային պողոտայի տարածքում էին, հայտնվեցին վտարվելու վտանգի առաջ՝ նրանք այլեւս ոչ թե ՀՀ քաղաքացիներ էին, այլ պետական կարեւորության օբյեկտի կառուցման խոչընդոտներ: Կարծում ենք՝ Հյուսիսային պողոտայի պատմությունը սրանով չի ավարտվի. սա դեռ շատ ջուր կվերցնի: Մանավանդ, Հյուսիսային պողոտան միակը չէ՝ առջեւում Կոնդի կառուցապատման հերթն է: Ինչպես ասում են՝ այսպես դեռ պետք է կարողանալ կանխագուշակել ..․»։

Այսօր Փաշինյանը և նրա թիմակից քաղաքապետն անում են այն, ինչը ժամանակին ակտիվորեն քննադատում էին և խոստանում էին, որ նոր Հայաստանում նման երևույթները բացառվելու են: Մարդկանց փաստացի կոպեկների դիմաց հանում են սեփական տներից, չենք խոսում՝ պատմամշակութային ժառանգության մասին, որն անխնա ոչնչացվելու է: Կոնդում 1 քմ-ն 214 հազար դրամ գումարը, որոնք բնակիչները պետք է վճարեն իրենց սեփականությունը գրանցելու համար, վերջիններիս համար մեծ բեռ է լինելու։ Թաղամասի բնակիչներից շատերը ստիպված են լինելու վարկ վերցնել, որպեսզի կարողանան վճարել սեփականությունը գրանցելու համար։ Այսպես պարտքեր ու վարկեր են կուտակելու, և երբ հայտնվի կառուցապատող, այդ բնակիչներն ստիպված կլինեն համաձայնվել օտարման պայմանների հետ: Այսինքն՝ կկրկնվի Հյուսիսային պողոտայի պատմությունը՝ էլ ավելի վատթար տարբերակով...