«Ո՞վ է որոշում՝ կինը ցանկալի՞ է, թե՞ ոչ»

Աղավնի Սուքիասյանն իր ֆեյսբուքյան էջում գրել է.

«Բոլոր ժամանակներում էլ գեղեցիկի ընկալումը մարդկանց մոտ շատ տարբեր է եղել: Քանի որ կանայք էլ հանդիսանում են գեղեցիկ սեռի ներկայացուցիչներ, ուստի գեղեցիկի ընկալումը, կարծես թե, անմիջականորեն կապվում է հենց նրանց հետ: Եվ ինչե՞ր ասես չեն անում կանայք այդ բաղձալի պիտակը ստանալու համար: Ժամանակի հետ գեղեցկության ընկալումները լայնանում են, իսկ չափերը՝ խիստ նեղանում: Այդ չափանիշներից մեկն էլ նիհար կազմվածքն է, որին հասնելու համար էլ կանայք տառապում էին դիետացավով: Եթե նախկինում կնոջ գեղեցկությունը գնահատելու համար անցկացվում էին գեղեցկության մրցույթներ. հիմա, պարզվում է, որ միայն դա քիչ է: Այսօրվա կինը գեղեցիկ լինելուց զատ պետք է լինի, այսպես ասած, ցանկալի:

Եվ հենց այս նպատակն էր հետապնդում Հայաստանում անցկացված մրցույթը՝ ձևավորելու համար հայ ցանկալի կանանց տասնյակները: Տասնյակները կազմելու էին հայկական շոուբիզնեսի փայլող դեմքերը: Այդ մրցույթների համար ընտրվեց մի աստղաբույլ, ովքեր էլ զբաղեցրեցին ամենատարբեր հորիզոնականներ:

Լուիզա Ներսիսյանը, բացի այն, որ լավ դերասանուհի է, իսկ երբեմն էլ հաղորդավարուհի, ընդգրկվեց մի ցուցակում, ուր պետք է որոշվեր նրա ցանկալիութունը: Այս դեպքում մրցանակը խիստ տարբերվելու էր մասնագիտության բերումով ձեռք բերած մրցանակներից:

Հաջորդ մեր աստղը Լիլիթ Հովհաննիսյանն էր: Հանրությանը մշտապես իր փոփոխվող կերպարներով զարմացնող այս երգչուհին համարձակից բացի ստացավ նաև մեկ այլ կոչում՝ ցանկալի:

Գերմանիայից մեր երկիր եկած ու այստեղ երգարվեստով զբաղվող Իվետա Մուկուչյանը նույնպես իր կարևոր տեղը զբաղեցեց այս մոդայիկ մրցույթում:

Հետաքրքիր է՝ ով է որոշում՝ կինը ցանկալի է, թե՞ ոչ: Կան արդյոք մեր երկրում ցանկալիությունը որոշող մասնագետներ և որտե՞ղ են նրանք մասնագիտացվել: Լավ կլիներ, որ գոնե մեկ – մեկ էլ կազմակերպվեին «Տարվա ամենաինտելեկտոալ աստղ», «Տարվա ամենաբարերար աստղ» և նման անվանակարգերով մրցույթներ: Որքան կհպարտանայինք, որ ցանկալիության առաջատար հորիզոնականները զբաղեցնողները առաջատարի իրենց դիրքերը պահպանեին նաև այստեղ: Ու քանի որ հայտնիները մշտապես գտնվում են մրցակցության մեջ, ուստի, ասենք, տարվա ամենակարդացած աստղը դառնալու համար նրանք պետք է շատ աշխատեին իրենց վրա: Այդ աշխատանքից էլ կշահեինք մենք՝ նրանց լսողներս ու դիտողներս:

Գուցե շոուբիզնեսում մրցանակներ շռայլելու այս նորությամբ էլ մենք մերը թելադրեինք մյուսներին»: