ՎԶԵԲ-ը երկարաձգում է իր մասնակցությունը «ՀԱՅԷԿՈՆՈՄԲԱՆԿ»-ի կանոնադրական կապիտալում

Հոկտեմբերի 25-ին տեղի ունեցավ «ՀԱՅԷԿՈՆՈՄԲԱՆԿ» ԲԲԸ կանոնադրական կապիտալում ՎԶԵԲ-ի մասնակցության երկարաձգման պայմանգրի կնքման պաշտոնական արարողությունը:

Ստորագրող կողմերը բարձր գնահատեցին «ՀԱՅԷԿՈՆՈՄԲԱՆԿ» ԲԲԸ կանոնադրական կապիտալում ՎԶԵԲ-ի յոթամյա /2004թ-ից/ մասնակցության արդյունքները, որիհիմքով ՎԶԵԲ-ը, Հայաստանում 1-ին անգամ, որոշում կայացրեց' իրենց գործառույթներով հնարավոր ժամկետով /եւս երեք տարով/ երկարաձգել ՎԶԵԲ-ի մասնակցությունը Բանկի կանոնադրական կապիտալում:

Բանկի եւ ՎԶԵԲ-ի որպես ռազմավարական բաժնետիրոջ /25% +1 բաժնետոմս/ բազմամյա փոխշահավետ համագործակցությունը առավելագույնս նպաստեց նշված ժամանակահատվածում համակարգաստեղծ «ՀԱՅԷԿՈՆՈՄԲԱՆԿ» ԲԲԸ կայուն եւ արդյունավետ զարգացմանը' ձեւավորելով կորպորատիվ բարձր մշակույթով, կանոնակարգվածությամբ, ռիսկերի եւ ներքին հսկողության կառավարմամբ, պլանավորման եւ բյուջետավորման սկզբունքներով, իննովացիոն մտածելակերպով գործող կառույց, որի բարձրորակ համախոհ մասնագետների թիմը ունակ է նույնիսկ ճգնաժամային պայմաններում լուծելու իր առջեւ ծառացած հիմնախնդիրները:

«ՀԱՅԷԿՈՆՈՄԲԱՆԿ» ԲԲԸ կանոնադրական կապիտալում ՎԶԵԲ-ի մասնակցության երկարաձգումը, հանդիսանալով բանկի գործունեության գնահատական համաշխարհային բարձր հեղինակություն ունեցող ռազմավարական բաժնետրոջ կողմից' առաջիկայում նույնպես թույլ կտա առավել արագ տեմպերով ապահովել Բանկի առաջընթաց զարգացումը ի հաշիվ բանկի միջազգային ճանաչման ընդլայնման, նոր հուսալի գործընկերների հետ արդյունավետ համագործակցության ծավալման, իննովացիոն բանկային տեխնոլոգիաների եւ պրոդուկտների ներդրման, մատուցվող ծառայությունների փաթեթի ամբողջականացման' նպատակաուղղված բանկի բաժնետերերի, հաճախորդների, գործընկերների, ինչպես նաեւ երկրի տնտեսության եւ ֆինանսաբանկային համակարգի հզորացման:

«ՀԱՅԷԿՈՆՈՄԲԱՆԿ» ԲԲԸ-ն ՎԶԵԲ-ի հետ համագործակցում է տարբեր ծրագրերով սկսած 2000թ.-ից անընդհատ ընդլայնելով համագործակցության շրջանակները: Մինչ օրս «ՀԱՅԷԿՈՆՈՄԲԱՆԿ» ԲԲԸ-ն ՎԶԵԲ-ի հետ համատեղ իրականացրել է ավելի քան 45 մլն ԱՄՆ դոլարի ծրագրեր:

2011թ.-ի հոկտեմբերի 24-ի դրությամբ «ՀԱՅԷԿՈՆՈՄԲԱՆԿ» ԲԲԸ ընդհանուր կապիտալը կազմում է մոտ 9.1 մլրդ դրամ, ընդհանուր ակտիվները' 61.2 մլրդ դրամ, վարկային ներդրումները' 29.1 մլրդ դրամ, ֆիզիկական անձանց ավանդները' 10.2 մլրդ դրամ: Զբաղեցնելով «Արքա» պլաստիկ քարտերի շուկայի մոտ կեսը' բանկի գործող տեղական եւ միջազգային քարտերի քանակը կազմում է մոտ 140,000 հատ: Բանկն ունի 38 մասնաճյուղ Հայաստանում եւ Արցախում: