Ստիպե՞լ են օղի խմել․ Զախարովայի սուր հակադարձումը Լավրովի մասին արված պնդմանը

Ռուսաստանի ԱԳՆ պաշտոնական ներկայացուցիչ Մարիա Զախարովան կտրուկ է արձագանքել Մեծ Բրիտանիայի նախկին վարչապետ Բորիս Ջոնսոնի հայտարարությանը, թե 2017 թվականին Մոսկվայում Սերգեյ Լավրովն իրեն ստիպել է մեծ քանակությամբ օղի խմել, գրում է «Կոմսոմոլսկայա պրավդա»-ն։

Զախարովայի խոսքով՝ իրականում ամեն ինչ ճիշտ հակառակն է եղել․ Ջոնսոնին ոչ ոք չի ստիպել խմել, ավելին՝ հենց ինքն է շարունակաբար խնդրել լցնել բաժակը։

«Նա կարող էր ընտրել իր առջև դրված գինին, բայց նախընտրեց օղին։ Ես շատ լավ հիշում եմ այդ ճաշը։ Ջոնսոնն անընդհատ խնդրում էր էլի լցնել»,-  ասել է Զախարովան։

Ռուս դիվանագետը հիշել է նաև Մեծ Բրիտանիայի նախկին արտգործնախարար Լիզ Թրասի մասնակցությամբ մեկ այլ ճաշկերույթ՝ ակնարկելով, որ նրա պահվածքը ևս առանձնապես չի փայլել դիվանագիտական զսպվածությամբ։

«Այստեղ նույնիսկ տղամարդիկ էին զարմացել։ Բրիտանուհու հետ եկած անգլիական փաբի մթնոլորտը ոչ մի կերպ չէր տեղավորվում Մորոզովի առանձնատան պատերի ներսում»,- հեգնել է Զախարովան։

Այս պատմության առիթը Ջոնսոնի ավելի վաղ արած հայտարարությունն էր։ Բրիտանիայի նախկին վարչապետը պնդել էր, թե 2017 թվականին Մոսկվա կատարած այցի ընթացքում Լավրովն իրեն ստիպել է հսկայական քանակությամբ օղի խմել՝ նստեցնելով շիկացած բուխարու դիմաց։

Ջոնսոնի պատմելով՝ ինքը Մոսկվա էր մեկնել Ռուսաստանի նախագահ Վլադիմիր Պուտինի հետ հանդիպելու և երկկողմ հարաբերությունները կարգավորելու մտադրությամբ, սակայն Պուտինը հրաժարվել էր ընդունել իրեն։ Արդյունքում հանդիպել էր Լավրովի հետ։

«Ես փորձում էի վերականգնել հարաբերությունները Ռուսաստանի հետ, բայց ամեն ինչ ավարտվեց աղետով։ Ի վերջո հանդիպեցի Լավրովի հետ։ Սարսափելի մարդ է, բացարձակ անհույս։ Նա ինձ ստիպեց հսկայական քանակությամբ օղի խմել՝ նստած չափազանց տաք բուխարու դիմաց։ Դա բառացիորեն հիշեցնում էր վիկտորիանական դարաշրջանի մասնավոր դպրոցներում կիրառվող պատիժները։ Սարսափելի էր»,- պատմել էր Ջոնսոնը։