«Պուտին» ակումբը բլե՞ֆ է

«Վլադիմիր Պուտին» անունով համազգային երիտասարդական շարժման վարչությունը որոշում է կայացրել հունվարի 31-ին Հայաստանում «Պուտին» ակումբի բացման մասին: Ակումբը բացվելու է Հայաստանի երիտասարդական շարժումների, նախաձեռնությունների և անհատ քաղաքացիների առաջարկությամբ։

Շարժման տարածած հաղորդագրությունում ասվում է, որ ակումբի նպատակն է լինելու ՌԴ նախագահի թեկնածու Վ. Պուտինի գաղափարների հանրայնացումը, Պուտինի կենսագրության և գործունեության վերաբերյալ քննարկում-սեմինարների անցկացումը, ինչպես նաև Հայաստան-Ռուսաստան հարաբերությունների, ընդհանուր պատմության և միասնական հաղթանակների մասին իրազեկության բարձրացումը:

Ակումբը կունենա իր էլեկտրոնային կայքը հայերեն և ռուսերեն լեզուներով, ինչպես նաև պարբերաբար կհրապարակի բուկլետներ, բրոշուրներ, թռուցիկներ, պաստառներ և ամսագրեր Վլադիմիր Պուտինի մասին: Ասված է մամլո հաղորդագրության մեջ։

Սկզբնական փուլում նախաձեռնությանը աջակցություն են հայտնել՝

«Առաջին ռազմահայրենասիրական» շարժումը,
«Հայկական մեդիա խումբ» կենտրոնը
«Բարսեղյան մեդիա» մեդիադաշինքը,
«Ռուսաց արծիվներ» ռազմահայրենասիրական միավորումը,
«Համագործակցություն հանուն ժողովրդավարության» հասարակական կազմակերպությունը,
«Մութ ուժեր» նախաձեռնությունը,
«Մեկ Փիղ» կազմակերպությունների դաշինքը,
«Կոտայքի հաշվապահների միություն» միավորումը,
«Ռադիո Վան» ռադիոկայանը, emedia.am-ը, religions.am-ը
«Հայոց բլոգոսֆերա» ազատ դաշինքը,
«Ազատ ռուսաֆիլներ» նախաձեռնությունը,
Երիտասարդ ակտիվիստներ,
Անհատ ձեռներեցներ,
Թոշակառուների միությունը,
Առանձին անհատներ և քաղաքական գործիչներ 

Դատելով «Վլադիմիր Պուտին» անունը կրող շարժման հաղորդագրության բովանդակությունից՝ կարելի է եզրակացնել, որ վերոնշյալ տեղեկատվությունը պետք չէ լուրջ ընկալել։ 

Հիշեցնենք, որ Հայկական երիտասարդական հասարակական կազմակերպությունների և ԱՊՀ երկրների երիտասարդական միության ղեկավարող խորհրդի կողմից որոշում էր ընդունվել փետրվարի 2-ից Հայաստանում բացել «Պուտին» ակումբ: