Կոնգրեսը հանդես է գալու միասնական ցուցակով

Հայ ազգային կոնգրեսի համակարգող Լևոն Զուրաբյանն այսօր լրագրողներին ներկայացրեց Կոնգրեսի կազմի մեջ մտնող 18 կուսակցությունների հայտարարությունը ընտրություններին մեկ միասնական դաշինքով հանդես գալու վերաբերյալ։

«Սա, ըստ էության, նշանակում է, որ Կոնգրեսի մաս կազմող 18 ուժերը ընտրական դաշինք են կազմելու խորհրդարանական ընտրություններին մասնակցելու նպատակով», – նշեց Զուրաբյանը։ Վերջինս այս հայտարարությունը համարում է  կուսակցությունների՝ սեփական շահերի երկրորդման գիտակցության ձևավորման արդյունք։ 

Ներկայացված հայտարարության վերջաբանում ազդարարվում է. «Կոնգրեսի մաս կազմող քաղաքական ուժերը որոշում են, որ նախընտրական դաշինքով մասնակցելու են առաջիկա ընտրապայքարին՝ սա դարձնելով գործող վարչախմբի դեմ համաժողովրդական ցասման գեներացման, քաղաքացիական ընդվզման, քաղաքական կամքի մեկտեղման, Սերժ Սարգսյանի նկատմամբ անվստահության արտահայտման հարթակ՝ լուծելու համար սահմանադրական կարգի վերականգնման, ժողովրդի իշխանության հաստատման գերխնդիրը»։

Ըստ Կոնգրեսի համակարգողի՝ կուսակցությունների այս քայլը կհեշտացնի համամասնական ցուցակի ձևավորման գործընթացը, թեև դա  լուրջ աշխատանք է, պահանջում է ժամանակ, որի ընթացքում կլինեն «կրքեր», բայց կոնսենսուսի, ըստ նրա, Կոնգրեսի մաս կազմող կուսակցությունները, այնուամենայնիվ, կհանգեն։ 

Իսկ թե ով կգլխավորի ցուցակը՝ դեռ հայտնի չէ, բայց Զուրաբյանը տրամաբանական է համարում, որ ցուցակը գլխավորի ՀՀ առաջին նախագահ Լևոն Տեր-Պետրոսյանը։