ԱՄՆ–ը Սաակաշվիլիի միջոցով ազդանշա՞ն է ուղարկում Ռուսաստանին

ԱՄՆ նախագահ Բարաք Օբաման կհանդիպի իր վրացի գործընկեր Միխայիլ Սաակաշվիլիի հետ: Թբիլիսիում կարծում են, որ քաղաքական տեսանկյունից այս հանդիպումը, որը կայանալու է ԱՄՆ–ի նախագահական ընտրությունների և Չիկագոյում ՆԱՏՕ–ի գագաթաժողովի նախաշեմին, շատ կարևոր է։

Սպիտակ տան հայտարարության մեջ նշվում է, որ նախագահները քննարկելու են ռազմավարական գործընկերության և տարբեր ոլորտներում համագործակցության մի շարք հարցեր։

«Նախագահ Օբաման կարևորում է Վրաստանի հետ պաշտպանության ոլորտում համագործակցությունը՝ Աֆղանստանում միջազգային անվտանգության ջանքերին ուղղված Վրաստանի կողմից նշանակալի ներդրումը», – ասված է Սպիտակ տան հաղորդագրությունում։ Վրացի փորձագետների կարծիքով՝ Սաաակաշվիլիի և Օբամայի հանդիպումը լուրջ ազդանշան է ոչ միայն պաշտոնական Թբիլիսիի, այլև Մոսկվայի համար։ 

Վրացի քաղաքագետ Նիկա Չիտաձեի կարծիքով՝ Օբամայի և Սաաակաշվիլիի հանդիպումը պայմանավորված է Վաշինգտոնի և Մոսկվայի միջև «վերաբեռնման» քաղաքականության անհաջող փորձով և Վաշինգտոնի կողմից Կրեմլին առաջ քաշած մի շարք պահանջների չկատարումով։ Նա նաև կարծիք է հայտնել, որ Սպիտակ տունն այս հանդիպումով ընդգծում է Հարավային Կովկասում ԱՄՆ-ի աշխարհաքաղաքական շահերի  պահպանման փաստը։

Հադսոն ինստիտուտի պրոֆեսոր, ամերիկացի քաղաքագետ Դեվիդ Սեթթերի կարծիքով՝ վրացի իր գործընկերոջ հետ Օբամայի հանդիպման որոշումը պայմանավորված է ԱՄՆ–ի և Ռուսաստանի միջև առկա բարդ հարաբերություններով։ 

Նախկինում Սաակաշվիլին Սպիտակ տան ղեկավարի հետ մի շարք հանդիպումներ է ունեցել, սակայն երկու երկրների նախագահների միջև այս հանդիպումը տեղի է ունենալու Սպիտակ տան օվալաձև սրահում։