Քաղաքապետը «ֆռցրե՞ց» երևանցիներին

Անցած տարվա վերջին երևանցիներին հաճելի անակնկալ մատուցեց նորանշանակ քաղաքապետ Տարոն Մարգարյանը՝ հրաման ստորագրելով Աբովյան փողոցի կրպակները ապամոնտաժելու մասին։ Մարդկանց մոտ հույսեր ծագեցին, որ Տարոն Մարգարյանը տարբերվելու է նախորդ քաղաքապետերից Երևանի հանդեպ իր վարբերմունքով, սակայն այդպիսի միամիտներին շուտով սառը ցնցուղ էր սպասվում։

Պարզվեց, որ Աբովյանից ապամոնտաժված կրպակները, ավելի ճիշտ՝ դրանցից առավել «էլիտարները», պարզապես տեղափոխվում են մեկ այլ հանրային տարածք՝ Մաշտոցի այգի, որի փրկության համար դեռ անցած տարվանից ակցիաներ էին արվում։

Նկատելով այգում ծայր առած շինարարությունը՝ «Մենք ենք այս քաղաքի տերը» քաղաքացիական նախաձեռնության անդամներն արագ արձագանքեցին՝ Facebook սոցիալական ցանցում ստեղծելով միջոցառում և բոլոր մտահոգվածներին կոչ անելով միանալ իրենց և պայքարել հանրային տարածքի պահպանման համար։

Այսօր այգում տեղի ունեցավ միջոցառում, որի ժամանակ ապամոնտաժված կրպակներն այդ տարածք տեղափոխելու դեմ իրենց բողոքն արտահայտեցին մտահոգված քաղաքացիները, «Մեր քաղաքը» հանրաjին քաղաքացիական նախաձեռնության, «Մենք ենք այս քաղաքի տերը» քաղաքացիական նախաձեռնության անդամները և Հայաստանի Կանաչների կուսակցության նախագահ Արմենակ Դովլաթյանը։
Ակցիայի մասնակիցները Երևանի քաղաքային իշխանություններից պահանջում են անհապաղ դադարեցնել այգում իրականացվող շինարարությունը և ապամոնտաժել արդեն իսկ կառուցված խանութները։

«Քաղաքային իշխանությունները պարտավոր են գտնել այնպիսի այլընտրանք, որը որևէ կերպ չի ոտնահարի Երևանի բնակիչների շահերը, այլ ոչ թե մի ընդհանուր օգտագործման տարածքից շինություններ ապամոնտաժել և տեղափոխել մեկ այլ ընդհանուր օգտագործման, այս անգամ՝ կանաչ տարածք։ Սա ոչ այլ ինչ է, քան խաբեություն, աչքակապություն և քաղաքացիների իրավունքների ոտնահարում»,-նշված է նախաձեռնության տարածած մամուլի հաղորդագրության մեջ։ Նախաձեռնության անդամ Գայանե Մելքումյանն ասաց, որ իրենք միջոցառմանը հրավիրել են նաև քաղաքապետարանից պատասխանատու ներկայացուցչի, սակայն քաղաքապետարանից այդպես էլ որևէ մեկը չեկավ։

Արմենակ Դովլաթյանն ասաց, որ իրենք պահանջում են անհապաղ դադարեցնել շինարարությունը, քանի որ այն իրականացնող «Սահակյանշին» ՓԲԸ ներկայացուցիչները չեն ներկայացրել նախագիծ կամ շինարարական աշխատանքների իրականացման թույլտվություն։

Լուրեր.com-ի թղթակցի հետ զրույցում «Մենք ենք այս քաղաքի տերը» քաղաքացիական նախաձեռնության անդամ Լենա Նազարյանն ասաց. «Մեր պահանջն է, որ քաղաքի այգիները չկառուցապատվեն: Եթե անգամ տարածքը անխնամ է, ապա ավելի լավ է այդպիսին մնա առժամանակ, քան բետոնապատվի: Ինչ վերաբերում է կրպակատերերին, ապա քաղաքապետարանը պետք է կարողանա այնպես լուծել հարցերը, որը ոչ հանրության իրավունքը տուժի, ոչ էլ կրպակատերերինը: Այս պահի դրությամբ շահում է միայն մասնավորը, ընդ որում` այն մասնավորը, որը հոնավանվորչություն ունի: Մասնավորապես, «Ուսանողական» այգում Տերյան փողոցի կողմից կառուցված հսկայական անճաշակ սրճարան կոչվող բետոնակույտի տերը պետության նախագահի թիկնազորի պետն է: Մենք դրա մասին նախկինում հայտարարել ենք: Այս տեղեկությունը երկար ժամանակ չէր բացահայտվում, որովհետև բոլոր ողջամիտ փաստարկնրով ապացուցում էինք, որ քաղաքը ամեն մի տգետ ճարտարապետի ու փող ունեցող կառուցապատողի փորձադաշտը չի: Խնդիրն այն է, որ քաղաքային իշխանություններն այդպես էլ չհասկացան, որ քաղաաքային մշակույթի մաս է նաև հանրային կանաչ տարածքը»։

Լենա Նազարյանը նշեց նաև, որ սպասում են քաղաքապետարանի արձագանքին, որից կախված՝ կորոշեն հետագա անելիքները։