«Ալ Քաիդան» «աշխատանքից ազատել է» ահաբեկիչներից մեկին՝ կարգապահության խախտման համար

«Ալ Քաիդա» միջազգային ահաբեկչական կազմակերպությունը հեռացրել է իր շարքերից ահաբեկիչ Մուխթար Բելմուխթարին, ով այս տարվա հունվարին Ալժիրում հարյուրավոր քաղաքացիներին պատանդ վերցրած գրոհայինն է: Ինչպես գրում է Associated Press-ը, նրան «ազատել են աշխատանքից» կարգապահության խախտման համար: Գործակալությունը գրում է, որ իր տրամադրության տակ է հայտնվել «Ալ Քաիդայի» կողմից գրված մի նամակ, որը Associated Press-ի լրագորղը հայտնաբերել էր Մալիում գրոհայինների կողմից նախկինում զբաղեցրած շինություններից մեկում:

Նամակի իսկությունը արդեն հաստատվել է մի քանի փորձագետների կողմից:

Նամակում նշվում է, որ իսլամական Մաղրիբի երկրների «Ալ Քաիդա» ճյուղավորումը մեղադրում է Մուխթար Բելմուխթարին հեռախոսազանգերին չպատասխանելու, ծախսերի վերաբերյալ զեկույցներ չներկայացնելու և ղեկավարության հրամանները չկատարելու համար: Բելմուխթարը նամակին պատասխանել է, թե ինքը ստեղծել է սեփական ահաբեկչական խմբավորումը, որն արդեն կազմակերպել է մի քանի խոշոր ահաբեկչական գործողություն: Նամակից հետևում է, որ Բելմուխթարը ցանկանում էր ենթարկվել անմիջականորեն «Ալ Քաիդայի» կենտրոնական ղեկավարությանը՝ շրջանցելով շրջանային ճյուղավորման ղեկավարներին:

Հիշեցնենք, որ Բելմուխթարը հանդիսանում է Ալժիրում այս տարվա հունվարին նավթարդյունաբերական համալիրի վրա հարձակում կազմակերպած ահաբեկիչներից մեկը: Պատանդ վերցրած 8 երկրների հարյուրավոր քաղաքացիներից զոհվել էին 37-ը: Ապրիլին Ալժիրի դատարանը նրան հեռակա կարգով մահվան էր դատապարտել: