«Չորրորդ ինքնիշխանություն». Ով միլիոնատեր չէ, թող չառաջադրվի

2007 թվականի խորհրդարանական ընտրությունների ժամանակ Շենգավիթ համայնքն ընդգրկող ընտրատարածքից մեծամասնական ընտրակարգով պատգամավոր էր դարձել Գրիգորի Մարգարյանը՝ Բելաջիոյի Գրիշը։ «ՉԻ» տեղեկություններով՝ վերջինիս առաջադրումն այս անգամ նույն ընտրատարածքից եւ նույն կարգով խիստ կասկածելի է։ Բանն այն է, որ Սերժ Սարգսյանը սկզբունք է հռչակել, որ ով չի կարողանալու «փող ծախսել» եւ ձայն բերել նաեւ ՀՀԿ–ին, պետք է չառաջադրվի։ Մեր տեղեկություններով՝ Գրիգորի Մարգարյանն այս անգամ որոշել է չառաջադրվել հենց այն պատճառով, որ ֆինանսական հնարավորություններն այլեւս չեն ներում ընտրությունների վրա միլիոններ ծախսելու համար։

Ի դեպ, «ՉԻ» տեղեկություններով՝ օրերս Եղվարդում ՀՀ Բնապահպանության նախարար Արամ Հարությունյանը «քեֆի է հրավիրել» այդ համայնքի բոլոր ընտրակեղծարարներին։ Հարությունյանը ծնունդով Եղվարդից է, եւ նախկին ընտրություններին վերջինիս վրա է դրված եղել այդ տարածքից ձայների «հավաքագրումը»։ Մեր տեղեկություններով՝ օրերս կայացած «քեֆի» շրջանակներում Հարությունյանը գովացել է ընտրակեղծարարներին՝ հորդորելով առաջիկայում համախմբվել եւ նույն ոգեւորությամբ աշխատել ՀՀԿ–ի համար։ Խոսակցություններ կան, որ ընտրակեղծիք իրականացնողներից «առաջատարներն» այդ օրը պարգեւատրվել են կլորիկ գումարով, ինչպես նաեւ համապատասխան աշխատանքները սկսելու հանձնարարական են ստացել, գրում է «Չորրորդ ինքնիշխանություն» թերթը։