ՄԱԿ-ի ԱԽ-ում կքննարկվի Սիրիայի հարցով բանաձև

ՄԱԿ-ի Անվտանգության խորհուրդը կքննարկի Սիրիայի հարցով բանաձևը։ Արաբական երկրների լիգայի կողմից պատրաստված փաստաթուղթը ենթադրում է Սիրիայի նախագահ Բաշար Ասադի հրաժարականը։ Նախնական տվյալներով՝ Անվտանգության խորհրդի 15 անդամ երկրներից առնվազն 10-ը կողմ կքվեարկեն նախագծին։

ՄԱԿ-ում ԱՄՆ մշտական ներկայացուցիչ Սյուզան Ռայսը պնդում է, որ փաստաթուղթը պետք է կրի խաղաղ բնույթ՝ առանց պատժամիջոցների ու առավել ևս՝ ուժային ճնշման հնարավորության։

«Մենք տեսնում ենք, թե ինչպիսին է Անվտանգության խորհրդի՝ վերջին տասը ամիսների անգործության հետևանքը։ Մեծամասնությունը պատրաստ է ընդունել փաստաթուղթը, սակայն երկու հեղինակավոր պետություններ չեն ցանկանում նկատել դա։ Խիստ անհրաժեշտ է, որպեսզի ԱԽ-ը ամբողջությամբ պաշտպանի Սիրիայի վերաբերյալ խաղաղ նախագիծը, հակառակ դեպքում քաոսն ու բռնությունը կահագնանան»,- ասել է նա։

Ռուսաստանն ու Չինաստանը, որոնք լինելով ՄԱԿ-ի ԱԽ-ի մշտական անդամներ՝ վետոյի իրավունք ունեն, մի շարք հարցեր ունեն ներկայացված փաստաթղթի վերաբերյալ։ Ռուսական ԱԳՆ-ում կարծում են, որ նախագծում առկա են պատժամիջոցներ։ Ռուսաստանի արտաքին գերատեսչության ղեկավար Սերգեյ Լավրովը հայտարարել է, որ իր երկիրը պատրաստվում է բանակցությունների հրավիրել սիրիական ընդդիմության ներկայացուցիչներին, ինչպես նաև մանրակրկիտ ուսումնասիրել միջազգային դիտորդների զեկույցը, որը գրվել է վերջիններիս՝ Սիրիայում կատարած աշխատանքից հետո։