Երկիր.«Խոստացված միլիոնը տեղ չի հասել»

«Կառավարությունը հինգշաբթի օրը հաստատեց այն որոշումը, որ հոկտեմբերի 2-ին Տավուշի մարզի Այրում երկաթուղային կայարանի մոտ տեղի ունեցած խոշոր սողանքի հետևանքով զոհվածների ընտանիքներից յուրաքանչյուրին հատկացվելու է մեկական միլիոն դրամ։

Սակայն   գումարը դեռևս հասցեատերերին չի հասել։ Աղետի զոհ դարձած Արմեն և Մեխակ Սորսումատյանների ընտանիքի անդամները «Երկիր»-ի հետ զրույցում նշեցին, որ դեռևս միայն լսել են հատկացվելիք գումարի մասին։ Արմենի կինը՝ Նաիրան, պատմեց, թե ցավակցելու հետ մեկտեղ ծանոթ-բարեկամներն այդ գումարի մասին էլ են տեղյակ պահում, կարծես «աչքալուսանք» լինի։ Այնինչ՝ ընտանիքի անդամները ցավում են, որ կորցրել են ընտանիքը կերակրող տղամարդկանց։ Տան միակ աշխատողը նրանք են եղել։

Մեխակ Սորսումատյանի յոթ երեխաներն ուև կինն այժմ ապրում են 22քմ տարածք ունեցող տան առաջին հարկում։ Բազմիցս դիմել են համայնքի վարչական շրջանին և քաղաքապետարանին՝ բնակարանը բարելավելու խնդրանքով, սակայն մերժում են ստացել։ Տան երկրորդ հարկում Արմենի ընտանիքն է ապրում՝ հայրը, երեք երեխան և կինը։ Նաիրան պատմում է, որ սկեսրայրի կենսաթոշակը 1500 դրամ բարձրացնելուց հետո կտրել են «Փարոսից» ստացվող նպաստը։

Ընտանիքի հոգսերը շատ են, և կառավարության կողմից չստացված մեկ միլիոնն էլ մի ցավի աչքը կհաներ, բայց դեռ սպասում են»,-գրում է «Երկիրը»։