ՄԱԿ-ի ԱԽ-ում սկսվել են Սիրիայի հարցի շուրջ քննարկումները

ՄԱԿ-ի Անվտանգության խորհրդում այսօր սկսվել են Սիրիայում իրավիճակի վերաբերյալ քննարկումները։

Արաբական պետությունների լիգայի գլխավոր քարտուղար Նաբիլ Էլ-Արաբին եւ Քաթարի վարչապետն Անվտանգության խորհրդին ներկայացրել են սիրիական ճգնաժամի հաղթահարման իրենց ծրագիրը, ըստ որի՝ պահանջվում է Սիրիայի նախագահի հրաժարականը և նախագահի պաշտոնի խաղաղ փոխանցումը երկրի փոխնախագահին։

Արաբական երկրների լիգայի առաջ քաշած այդ ծրագրին հավանություն են տվել ԱՄՆ–ն և ԵՄ անդամ երկրները, սակայն Ռուսաստանն ու Չինաստանն իրենց անհամաձայնությունն են հայտնել այդ ծրագրի մասով։ Ռուսաստանը Սիրիայում ստեղծված իրավիճակի հետ կապված հանդես է եկել սեփական նախաձեռնությամբ, սակայն Սիրիայի ընդդիմությունը հայտարարել է, որ չի պատրաստվում Ռուսաստանի հետ բանակցել, հաղորդում է CNN–ը։

Հիշեցնենք, որ Սիրիայում արդեն 10 ամիս է շարունակվում են հակակառավարական ցույցերը, որոնց մասնակիցները պահանջում են նախագահ Բաշար Ասադի հրաժարականը։ Ցույցերի արդյունքում, ըստ ՄԱԿ–ի տվյալների, զոհվել է ավելի քան 5 հազ. մարդ։