Սիրիացի ապստամբները դիմել են ՄԱԿ-ի ԱԽ-ին` վերջնագիր հղելով Ռուսաստանին

Սիրիական ընդդիմությունը ուղերձ է հղել ՄԱԿ-ի անվտանգության խորհրդին, որում պահանջել է Ռուսաստանից դադարեցնել սիրիական հակամարտությանը միջազգային հանրության միջամտության վրա արգելքներ դնելը և սպառնացել է մարտական գործողությունները տեղափոխել Լիբանանի տարածք. փոխանցում է Gazeta.ru-ն:

Ապստամբների կողմից նման վերջնագիր ներկայացնելու առիթը Ռուսաստանի կողմից շաբաթ օրը ՄԱԿ-ի ԱԽ-ի հռչակագրի վրա դրված վետոն է, որի պատճառով հնարավոր չեղավ միջամտել Սիրիայի Ալ Քուսեյր քաղաքում սիրիացի ապստամբների և կառավարական բանակի միջև ընթացող մարտական գործողություններին:

«Ալ Քուսեյրի քաղաքացիների անունից Գերագույն ռազմական խորհուրդը Ռուսաստանից պահանջում է հրաժարվել միջազգային հանրության միջամտությանը խոչընդոտող իր քաղաքականությունից»,-ասված է «Սիրիայի ազատ բանակ» ընդդիմադիր խմբավորման Գերագույն ռազմական խորհրդի ուղերձում: