Թուրքիայում Անթալիայի քաղաքապետը հրաժարվել է ջուր մատակարարել ոստիկանության ջրցան մեքենաներին

Թուրքիայում վարչապետ Էրդողանի ռեժիմի դեմ հակակառավարական զանգվածային բողոքի ցույցերին միացել են նաև խոշոր քաղաքների իշխանությունները: Անթալիայի քաղաքապետ Մուստաֆա Աքայդընը, ով չի պատկանում իշխող «Արդարություն և զարգացում» կուսակցությանը, կարգադրել է ցույցը ցրող ոստիկաններին ջուր չտրամադրել նրանց ջրցան մեքենաների համար. գրում է РБК-ն:

Քաղաքապետը, ով չի պաշտպանում Էրդողանի քաղաքականությունը, արգելել է համայնքային ծառայություններին ջուր մատակարարել ոստիկանության ջրցան մեքենաներին: Ոստիկանները այդ նպատակով դիմել են հրշեջ ծառայություններին, սակայն վերջիններս իրենց աջակցությունն են հայտնել քաղաքապետի դիրքորոշմանը և հրաժարվել են ջուր տրամադրելուց: Արդյունքում՝ ոստիկանները ցույցը ցրել են միայն արցունքաբեր գազի միջոցով:

Նշենք, որ անկարգությունները Թուրքիայում սկսվել են այն բանից հետո, երբ երկրի իշխանությունները որոշել էին վերակառուցել Ստամբուլ քաղաքի կենտրոնական Թաքսիմ հրապարակում գտնվող Ղեզի զբոսայգին` վերականգնելով անտեղ Օսմանյան կայսրության ժամանակաշրջանի զորանոցները: Խաղաղ ցույցը վերածվել էր ոստիկանության հետ բախումների, որի արդյունքում այս պահին կա 3000-ից ավել վիրավոր և 3 զոհ: Հարյուրավոր քաղաքացիներ ձերբակալվել են: Ակտիվիստները Էրդողանին մեղադրում են «սողացող իսլամականացման» մեջ: