«Չորրորդ ինքնիշխանություն». Հրազդանի քաղաքապետն ու Շուրա Բալագանովը

Խոսելով Հրազդանում տիրող նախընտրական իրավիճակի մասին` գործող քաղաքապետ Արամ Դանիելյանը հայտարարել է, թե «մեր մրցակիցները, իրենց գործելաոճին համապատասխան, փորձում են վախի մթնոլորտ ձևավորել», գրում է «Չորրորդ ինքնիշխանությունն» ու հավելում. «Սա, համաձայնվեք, ավելի շուտ հիշեցնում է Շուրա Բալագանովի դամբանական ճառը՝ արտասանված Պանիկովսկու գերեզմանին: Ճառը սկսվում է «միջազգային դրությունը... մեր պատասխանը Չեմբեռլենին»բառերով, և ըստ էության՝ այդ բառերով էլ ավարտվում է: Շուրա Բալագանովը մեղք չունի. ինչ-որ տեղ լսել է այդ բառերը և արտասանում է: Հրազդանի գործող քաղաքապետ Արամ Դանիելյանն էլ ինչ-որ տեղ «վախի մթնոլորտ՚ բառակապակցությունն է լսել, եւ բնականաբար» առաջին իսկ առիթով օգտագործում է: Հետաքրքիր է՝ երբևէ նման նախադեպ եղե՞լ է, որ գործող իշխանությունը տիրապետի հնարավոր բոլոր լծակներին, ակտիվորեն օգտագործի դրանք և միաժամանակ հայտարարի, թե ընդդիմության թեկնածուն վախի մթնոլորտ է ձևավորում: Չէ, մենք հասկանում ենք, որ անձամբ ինքը կարգին վախեցած է: Բայց դա նույնն է, թե ինչ-որ մեկը սուզվի սեփական լոգասենյակի վաննայում ու հայտարարի, թե համաշխարհային ջրհեղեղը սկսվել է»: