«Հրապարակ». ՀՀԿ-ում շարունակվում են ցուցակի շուրջ «բազարները»

ՀՀԿ համամասնական ցուցակի շուրջ «բազարները» շարունակվում են: Խնդիրն այն է, որ ՀՀԿ համամասնական ցուցակը բաղկացած է լինելու ոչ միայն ՀՀԿ-ականներից, այլ նաև այլ կուսակցությունների ներկայացուցիչներից, ինչը մտահոգում է ՀՀԿ-ականներին, քանի որ ինչքան էլ ասենք, որ ՀՀԿ-ն մեր կյանքի առաջատար ուժն է, միևնույնն է՝ դրսից ՀՀԿ ցուցակ մուտքը տեղի է ունենալու հենց նրանց հաշվին։ Ի վերջո, անցողիկ տեղերի քանակն անսահմանափակ չէ, գրում է «Հրապարակը»՝ հավելելով, որ այդ ցուցակում կարող են լինել մի քանի ոչ խորհրդարանական կուսակցությունների լիդերներ, որոնց ՀՀԿ նախագահը խորհրդարան է բերում Հայ ազգային կոնգրեսին լռեցնելու համար: Նայց ՀՀԿ ցուցակի նկատմամբ ավելի մեծ հավանականություններ ունի ՄԻԱԿ-ը, որի փաստացի ղեկավարը ՀՀԿ նախընտրական շտաբի ղեկավարի տեղակալ Միքայել Մինասյանն է:

ՄԻԱԿ-ի անդամները ոչ միայն ուզում են մեխանիկորեն փոխարինել ՀՀԿ որոշ անդամների, այլև դա անում են միանգամայն գաղափարական հիմքի վրա: Նրանք համարում են, որ նախագահ Սերժ Սարգսյանի շրջապատում տեղի է ունենում տեսակների պայքար, և իրենց նոր և ավելի առաջադիմական տեսակը պետք է հաղթանակի հին և իր դարն ապրած տեսակին, որը ներկայացնում է ՀՀԿ հին գվարդիան: Իսկ ի՞նչ էական հատկանիշներով է տարբերվում ՄԻԱԿ-ը ՀՀԿ-ից և նրա ներկայացուցիչներից: ՄԻԱԿ-ում համարում են, որ այստեղ հավաքվել են եվրոպական կրթություն ստացած, լուրջ ինտելեկտուալ կարողություններ ունեցող անհատներ, որոնց տեսնելով ու լսելով՝ հայ հանրությունը միանգամից կփոխի իր կարծիքը ՀՀԿ-ի նկատմամբ, բնականաբար՝ դրական ուղղությամբ և ինքնամոռաց կգնա ընտրատեղամասեր՝ քվեարկելու ՀՀԿ համամասնական ցուցակի օգտին: Մինչդեռ եթե ցուցակում լինեն Ռազմիկ Զոհրաբյանը, Գալուստ Սահականը և ՀՀԿ-ական օլիգարխիայի կարկառուն ներկայացուցիչների անուններ, հայ հանրությունը, նրանց տեսքից ու անունից զզված, ընտրություն կկատարի ԲՀԿ-ի կամ այլ ընդդիմադիր, կամ կեղծ ընդդիմադիր ուժերի օգտին: