Գոհար Պողոսյանին տեղեկանք տված բժշկին նկատողություն են արել

ՀՀ Ազգային ժողովի աշխատակազմի հասարակայնության և տեղեկատվության միջոցների հետ կապերի վարչության պետ Գոհար Պողոսյան, որը աշխատանքից հեռացվել էր ԱԺ նախագահ Սամվել Նիկոյանի կարգադրությամբ, պարզվում է՝ կեղծ տեղեկանք է ներկայացրել խորհրդարան: Դա պարզել է ՀՀ Ազգային ժողովի նախագահի կարգադրությամբ ստեղծված՝ ծառայողական քննություն վարող հանձնաժողովը: Ստորև ներկայացնում ենք հանձնաժողովի եզրակացությունն ամբողջությամբ.

«ՀՀ Ազգային ժողովի աշխատակազմի հասարակայնության և տեղեկատվության միջոցների հետ կապերի վարչության պետ Գոհար Պողոսյանն աշխատանքի չի ներկայացել 2012թ. հունվարի 9-ին, 10-ին և 11-ին, սակայն աշխատանքից բացակայելու մասին նա սահմանված կարգով նախապես չի տեղեկացրել իր ղեկավարներին' ՀՀ Ազգային ժողովի նախագահին կամ ՀՀ Ազգային ժողովի աշխատակազմի ղեկավարի պաշտոնակատար Գ. Մխեյանին և չի ստացել նրանց թույլտվությունը աշխատանքից բացակայելու համար: Այդ ընթացքում նա գտնվել է արտերկրում, բայց այդ օրերի համար ԱԺ աշխատակազմ է ներկայացրել հայաստանյան բուժհաստատության կողմից տրամադրված անաշխատունակության թերթիկ:

Գ. Պողոսյանի կողմից աշխատանքային օրենսդրության պահանջները խախտելու հանգամանքը պարզելու և եզրակացություն ներկայացնելու նպատակով, «Հայաստանի Հանրապետության Ազգային ժողովի աշխատակազմում պետական ծառայության մասին» ՀՀ օրենքի համաձայն ս.թ. հունվարի 20-27-ը անցկացվել է ծառայողական քննություն: Ծառայողական քննության արդյունքում պարզվել է, որ Գ. Պողոսյանի կողմից ՀՀ օրենսդրությամբ սահմանված կարգի խախտմամբ ստացած անաշխատունակության թերթիկն այն տրամադրող բուժհաստատության կողմից ճանաչվել է անվավեր, իսկ տրամադրող բժշկին հայտարարվել է խիստ նկատողություն:
Ծառայողական քննություն անցկացնող հանձնաժողովը, հիմք ընդունելով, ծառայողական քննության նյութերը, պարզել է, որ Գ. Պողոսյանը ՀՀ օրենսդրության խախտմամբ է ստացել անաշխատունակության թերթիկը, ինչպես նաև չի տեղեկացրել ՀՀ Ազգային ժողովի նախագահին կամ ՀՀ Ազգային ժողովի աշխատակազմի ղեկավարի պաշտոնակատար Գ. Մխեյանին և չի ստացել նրանց թույլտվությունը աշխատանքից բացակայելու համար: Ուստի, 2012թ. հունվարի 9-11-ը ներառյալ Գ. Պողոսյանի՝ աշխատանքից բացակայությունները չեն կարող համարվել հարգելի:

Ղեկավարվելով ՀՀ օրենսդրությամբ եւ հաշվի առնելով ծառայողական քննություն վարող հանձնաժողովի եզրակացությունը՝ ՀՀ Ազգային ժողովի նախագահը 2012 թվականի հունվարի 30-ի կարգադրությամբ Գ. Պողոսյանի նկատմամբ կիրառել է օրենքով նախատեսված կարգապահական տույժ' Գ. Պողոսյանն ազատվել է զբաղեցրած պաշտոնից»: