Պետրոս Դուրյանի մասունքը վաղը կամփոփվի հայ մեծերի կողքին

Երևանի Կոմիտասի անվան պանթեոնում վաղը հուշապատի մեջ կամփոփվի արևմտահայ վաղամեռիկ բանաստեղծ Պետրոս Դուրյանի մասունքը /գանգի բեկորները/: Արարողության համար Պոլսի Սկյուտարի հայոց գերեզմանատնից՝ բանաստեղծի շիրմից բերվել է հող: Դուրյանի մասունքը, հողի հետ խառնված, սափորով կամփոփվի հուշապատում՝ հոգեհանգստի արարողությամբ:

1957 թ. Ստամբուլի քաղաքապետարանի որոշմամբ Սկյուտար թաղամասի Ս. Խաչ եկեղեցու «Պաղլարպաշը» հայոց գերեզմանատան մի հատվածը հատկացվում է նոր ճանապարհի կառուցմանը: Կոստանդնուպոլսի Հայոց պատրիարքարանը հոգացել է, որպեսզի անցկացվելիք ճանապարհի վրա ընկնող շիրիմները տեղափոխվեն գերեզմանատան խորքը: Նշյալ շիրիմների թվում է եղել նաև Պետրոս Դուրյանի շիրիմը՝ իր մահարձանով: Պատրիարք Գարեգին Խաչատուրյանի /ով ներկա էր նախկին շիրիմի քանդմանը/ կարգադրությամբ բանաստեղծի գանգի բեկորները տեղափոխվել են պատրիարքարան և ավելի քան 10 տարի պահվել այնտեղ: 1960-ական թթ. վերջերին հաջորդ պատրիարքը՝ Շնորհք Գալուստյանը մասունքը գաղտնի բերում և հանձնում է Վազգեն Ա կաթողիկոսին, ով էլ իր հերթին 1969 թ. այն ի պահ է հանձնում Ե. Չարենցի անվան գրականության և արվեստի թանգարան: 1970 թ. թանգարանի գիտական խորհուրդը որոշում է կայացնում դիմել մարդաբան Անդրանիկ Ճաղարյանին' գանգի ոսկրերի միջոցով Պ. Դուրյանի դիմապատկերը վերականգնելու առաջարկով: Որոշման համար հիմք է հանդիսացել այն հանգամանքը, որ բանաստեղծը լուսանկար չի ունեցել: Ճաղարյանը վերականգնել է Դուրյանի դիմապատկերը, ստեղծել կրկնակ դիմաքանդակ /նույնպես պահպանվում է թանգարանում/, այնուհետև գանգի ոսկրերը վերադարձրել է թանգարան: Այս տարիներին պարբերաբար քննարկման առարկա է դարձել Դուրյանի մասունքը ամփոփելու հարցը: 2011 թ. Ե. Չարենցի անվան գրականության և արվեստի թանգարանը առաջարկությամբ դիմում է ՀՀ մշակույթի նախարարությանը' մասունքը Կոմիտասի անվան պանթեոնում ամփոփելու համար:

ՀՀ մշակույթի նախարարության, Երևանի քաղաքապետարանի, ՀՀ արտաքին գործերի նախարարության, ՀՀ գրողների միության, ԳԱԱ Մ. Աբեղյանի անվան գրականության ինստիտուտի, Մայր Աթոռ Սուրբ Էջմիածնի համատեղ քննարկումների արդյունքում որոշում է կայացվում Պետրոս Դուրյանի մասունքն ամփոփել Երևանի Կոմիտասի անվան պանթեոնի հուշապատի մեջ: