Ավստրիան սկսել է Գոլանի բարձունքներից իր զինծառայողների դուրսբերումը

Ավստրիան սկսել է Գոլանի բարձունքներից՝ Սիրիայի և Իսրայելի միջև ապառազմականացված սահմանագծից իր ռազմական ներուժը դուրս բերելու գործընթացը. գրում է Reuters-ը: Իր զորքերը դուրս բերելու մասին որոշումը Ավստրիան կայացրել էր` ելնելով սահմանամերձ հատվածում ռազմական դրության սրացումից:

Հետ կանչված զինվորներին տեղափոխող առաջին ինքնաթիռը այս հինգշաբթի օրը վայրէջք կկատարի Վիեննայում, իսկ ավստրիական ողջ կորպուսը կհեռանա Գոլանից առաջիկա 2-4 շաբաթների ընթացքում. գործակալությանը հայտնել են Ավստրիայի ԱԳՆ-ից:

Ավելի վաղ հայտնի էր դարձել, որ ավստրիացի խաղաղապահներին Գոլանի բարձունքներում կփոխարինեն Ֆիջիի զինվորականները: